کراچی (اسپورٹس رپورٹر) پاکستان کے جارح مزاج بلے باز عثمان خان نے تیز ترین لسٹ اے ڈبل سنچری کا نیا قومی ریکارڈ قائم کر دیا۔ اقبال اسٹیڈیم فیصل آباد میں کھیلے گئے پریذیڈنٹ کپ کے میچ میں ایشال ایسوسی ایٹس کے عثمان خان نے سوئی ناردرن گیس کے خلاف شاندار کارکردگی کا مظاہرہ کرتے ہوئے 131 گیندوں پر اپنی ڈبل سنچری مکمل کی۔ عثمان نے اپنی اننگز میں 132 گیندوں پر 201 رنز بنائے اور ریٹائرڈ آؤٹ ہوئے۔ یہ پاکستان کی لسٹ اے کرکٹ میں تیز ترین ڈبل سنچری تھی، اس سے پہلے یہ ریکارڈ شرجیل خان کے پاس تھا جنہوں نے 2 سال قبل 2022 میں سندھ کی نمائندگی کرتے ہوئے خیبر پختونخوا کے خلاف 133 گیندوں پر اپنی ڈبل سنچری مکمل کی تھی۔ یہ عثمان خان کے کیرئیر کا 10 واں لسٹ اے میچ تھا، وہ اب تک10 لسٹ اے میچز میں ایک ڈبل سنچری، ایک سنچری اور 4 نصف سنچریوں کی مدد سے 81 عشاریہ 5 کی اوسط کے ساتھ 652 رنز بناچکے ہیں۔ عثمان خان لسٹ اے میچز میں ڈبل سنچری کرنے والے 7ویں پاکستانی کرکٹر ہیں۔ اس ان سے قبل فخر زمان، عابد علی، محمد علی، شرجیل خان، کامران اکمل اور خالد لطیف بھی یہ کارنامہ انجام دے چکے ہیں۔ پاکستان کے ٹاپ لسٹ اے اسکوررز کی فہرست میں فخر زمان- 210* – 2018 عابد علی- 209* – 2018 محمد علی- 207 – 2005 شرجیل خان- 206 – 2022 خالد لطیف- 204* – 2009 عثمان خان- 201 – 2024 کامران اکمل- 200 – 2018 شامل ہیں۔
