قلات: بلوچستان کے ضلع قلات میں ہونے والے ایک بم دھماکے میں تین سیکورٹی اہلکار شہید اور چار زخمی ہوگئے ہیں۔
قلات میں انتظامیہ کے ایک سینیئر اہلکار نے بتایا کہ یہ واقعہ شہر کے قریب اسکلکو روڈ پر پیش آیا ہے۔اسکلکو روڈ پر دشت محمود کے مقام پر نامعلوم افراد نے دھماکہ خیز مواد نصب کیا ہوا تھا۔دھماکہ خیز مواد اس وقت پھٹا جب سکیورٹی فورسز کی ایک گاڑی وہاں سے گزر رہی تھی۔
ان کا کہنا تھا کہ دھماکے کی زد میں آنے کی وجہ سے گاڑی میں سوار تین اہلکار شہید جبکہ چار زخمی ہوگئے۔ زخمی اہلکاروں کو طبی امداد کی فراہمی کے لیے ہسپتال منتقل کیا گیا ہے۔اہلکار نے بتایا کہ دھماکہ دیسی ساختہ بم کے ذریعے کیا گیا ہے۔ اس واقعے کی ذمہ داری تاحال کسی گروہ نے قبول نہیں کی ہے۔
