شمالی کیرولینا: امریکا کے سابق صدر ڈونلڈ ٹرمپ کا کہنا ہے کہ میراخیال ہے کہ اسرائیل کو ایران کی جوہری تنصیبات پر حملہ کردینا چاہیے۔
صدارتی الیکشن کی مہم کے دوران ریاست شمالی کیرولینا میں ایک تقریب سے خطاب کرتے ہوئے کہا کہ ان کے خیال میں میزائل حملوں کے جواب میں اسرائیل کو ایران کی جوہری تنصیبات کو نشانہ بنانا چاہیے، یہی وہ جگہ ہے جہاں حملہ ہونا چاہیے۔
ٹرمپ کاکہنا تھا کہ جو بائیڈن کی جانب سے ایران پر حملوں کی حمایت نہ کرنا غلط ہے، ہمیں جس سب سے بڑے خطرے کا سامنا ہے وہ ایران کے جوہری ہتھیار ہیں، پہلے ایرانی جوہری تنصیبات پرحملہ کیا جائے دیگر کو بعد میں دیکھیں گے.
ڈونلڈ ٹرمپ کی الیکشن مہم کے سلسلے میں یہ تقریب فیٹیویلے کے ٹاؤن ہال میں رکھی گئی تھی جس کے قریب ہی ایک فوج کی ایک بڑی بیس واقع ہے۔
امریکی صدر جو بائیڈن نے بدھ کو اسرائیل کی طرف تقریباً 200 ایرانی میزائل داغنے کے جواب میں ایران کی جوہری تنصیبات کے خلاف اس طرح کے حملوں کی مخالفت کی تھی۔
اگلے ماہ امریکہ کے صدارتی الیکشن میں حصہ لینے والے ریپبلکن امیدوار ڈونلڈ ٹرمپ نے مشرق وسطیٰ میں حالیہ کشیدگی میں اضافے کے بارے میں بہت کم بات کی ، ٹرمپ نے رواں ہفتے ایک سخت بیان جاری کیا جس میں بائیڈن اور ہیرس کو بحران کا ذمہ دار ٹھہرایا۔
