کراچی:ملک میں کل جمعرات کے روز سے تیز ہواؤں کے ساتھ شدید بارش کا امکان ہے جب کہ کراچی میں موسم گرم رہے گا۔
محکمہ موسمیات کی جانب سے 26 ستمبر (جمعرات) سے ملک کے مختلف علاقوں میں گرج چمک کے ساتھ شدید بارش کی پیش گوئی کی گئی ہے جب کہ اس دوران تیز ہوائیں بھی چلتی رہیں گی۔ کل سے یکم اکتوبر تک کی پیش گوئی کے مطابق وفاقی دارالحکومت اسلام آباد، پنجاب، گلگت بلتستان، کشمیر اور خیبر پختونخوا میں بارشیں متوقع ہیں۔
ارلی وارننگ سینٹر کے مطابق سندھ میں جمعرات سے ہفتے کے روز تک میرپورخاص، تھرپارکر، عمرکوٹ اور گردونواح میں بارشوں کا امکان ہے جب کہ دیگر علاقوں میں موسم خشک، گرم اور مرطوب رہے گا۔
کراچی میں اگلے 24 گھنٹوں کے دوران موسم گرم اور مرطوب رہنےکا امکان ظاہر کیا گیا ہے۔ اس دوران کم از درجہ حرارت 27.5 ڈگری سینٹی گریڈ اور زیادہ سے زیادہ 35 ڈگری سینٹی گریڈ تک رہنےکا امکان ہے۔
محکمہ موسمیات کی جانب سے آج سے متعلق بتایا گیا ہے کہ ہوا میں نمی کا تناسب 81 فیصد ہے اور اس وقت مغرب سے 11کلو میٹرفی گھنٹہ کی رفتار سے ہوائیں چل رہی ہیں۔
اُدھر بلوچستان کے بیشتر اضلاع میں بھی موسم گرم اور خشک رہنے کا امکان ہے۔
