طوفانی بارشوں کے بعد بھارت میں خوفناک منظر سامنے آیا، جب ایک مگرمچھ گھر کی چھت پر پہنچ گیا۔ علاقے کے لوگ اس حیرت انگیز واقعے سے خوفزدہ ہوگئے۔
رپورٹ کے مطابق بھارتی ریاست گجرات کے شہر وڈودرا میں حالیہ طوفانی بارشوں کے باعث سیلابی صورتحال پیدا ہوگئی ہے، جس کے نتیجے میں نہ صرف جانی اور مالی نقصان ہوا بلکہ جنگلی حیات بھی متاثر ہوئی۔
اس صورت حال میں ایک غیر معمولی واقعہ پیش آیا، جب ایک مگرمچھ پانی کے بہاؤ میں بہہ کر ایک گھر کی چھت پر پہنچ گیا۔
مقامی افراد کا کہنا ہے کہ مگرمچھ کو دیکھ کر گھر کے مکینوں میں خوف و ہراس پھیل گیا۔ فوری طور پر ریسکیو ٹیموں کو اطلاع دی گئی، جنہوں نے موقع پر پہنچ کر مگرمچھ کو بحفاظت پکڑ لیا اور اسے محفوظ مقام پر منتقل کر دیا۔
