میرپورخاص(نمائندہ جسارت) میرپور خاص میں گیس کی لائنوں میں سے پانی آنے لگا،صارفین پریشان گیس کی عدم فراہمی دو وقت کی روٹی پکانا مشکل،گیس کا عملہ لائن کی لیکیج ڈھونڈنے میں مصروف۔تفصیلات کے مطابق حالیہ بارش کے بعد جہاں لوگ بارش کے کھڑے پانی سے پریشان ہیں اب دوسری جانب نئی پریشانی سے مزید اذیت کا شکار ہونے لگے ہیں میرپورخاص کے علاقے پاک کالونی میں واقع سیکڑوں گھروں میں سوئی گیس کی لائنوں میں گیس کے بجائے پانی آنے لگا جس کی وجہ سے سیکڑوں صارفین اذیت کا شکار ہونے لگے علاقہ مکینوں نعمان اور دیگر کا کہنا تھا کہ ہم پہلے بارش کے کھڑے پانی اور علاقے میں بجلی نہ ہونے سے پریشان تھے اب گیس کی لائنوں میں گیس کے بدلے پانی آرہا ہے جس کی وجہ سے دو وقت کا کھانا بنانا بھی مشکل ہوگیا مجبوری میں ہوٹلوں سے کھانا منگوا رہے ہیں علاقہ مکینوں کی جانب سے شکایت پر محکمہ سوئی گیس نے موقع پر پہنچ کر فالٹ کی تلاش شروع کردی۔
