کراچی: داؤد یونیورسٹی آف انجینئرنگ کی وائس چانسلر ڈاکٹر ثمرین کی گاڑی پر فائرنگ کا واقعہ پیش آیا، تاہم وہ محفوظ رہیں جب کہ مسلح افراد فائرنگ کے بعد فرار ہو گئے۔
نجی ٹی وی کی رپورٹ کے مطابق اورنگی ٹاؤن میں یوم آزادی کی مناسبت سے گرلز کالج میں تقریب کا انعقاد کیا گیا تھا، جس میں ڈاکٹر ثمرین مدعو تھیں کہ تقریب کے دوران نامعلوم مسلح شخص نے فائرنگ کردی، تاہم ڈاکٹر ثمرین محفوظ رہیں۔
پولیس حکام کے مطابق ڈاکٹر ثمرین کی گاڑی کالج کے اندر تھی، جس پر ملزم کی جانب سے 2 گولیاں چلائی گئیں۔ ابتدائی اطلاعات کے مطابق واقعہ اسٹریٹ کرائم کا نہیں لگتا بلکہ کچھ اور معاملہ ہو سکتا ہے، اس حوالے سے تحقیقات کی جا رہی ہے۔
وزیر داخلہ سندھ ضیا الحسن لنجار نے واقعے کا نوٹس لیتے ہوئے ڈی آئی جی ویسٹ سے تفصیلات طلب کرلیں۔ انہوں نے ملزمان کو جلد گرفتار کرنے کی ہدایات جاری کی ہیں۔
