پیرس (این این آئی)آسٹریلیا کی اولمپک ہاکی ٹیم کے کھلاڑی ٹام کریگ کو کوکین خریدنے کے الزام میں حراست میں لینے کے بعد پیرس میں گرفتار کر لیا گیا تھا۔ خبر رساں ایجنسی کے مطابق آسٹریلیا کی اولمپک کمیٹی نے بتایا تھا کہ ان کی مردوں کی ہاکی ٹیم کے ایک رکن کو گرفتار کر لیا گیا ہے لیکن اس کھلاڑی کا نام نہیں بتایا گیا تھا۔پیرس کے پراسیکیوٹر کے دفتر نے بھی کھلاڑی کے نام کی تصدیق نہیں کی تھی لیکن کہا تھا کہ ایک آسٹریلین کھلاڑی کوکین خریدنے کے الزام میں حراست میں لیا گیا ہے۔ تین سال قبل ٹوکیو اولمپکس میں چاندی کا تمغہ جیتنے والے کریگ آسٹریلین قومی ٹیم کے لیے 100 سے زیادہ میچ کھیل چکے ہیں۔ آسٹریلیا کی مردوں کی ٹیم پیرس اولمپکس کے کوارٹر فائنل میں اتوار کو ہالینڈ کے ہاتھوں 0-2 کی شکست کے بعد ناک آؤٹ ہو چکی ہے۔ پراسیکیوٹر کے دفتر سے جاری بیان میں کہا گیا کہ پولیس افسران نے 6 اور 7 اگست کی درمیانی شب کو پیرس کی ایک عمارت سے کوکین کے لین دین کی خبر ملی تھی جس کے بیچنے کے الزام میں گرفتار شخص دسمبر 2006 میں پیدا ہوا تھا اور خریدار آسٹریلیا میں ستمبر 1995 میں پیدا ہوا تھا۔پیرس 2024 کے نتائج کی ویب سائٹ پر موجود کریگ کی پروفائل کے مطابق کریگ 3 ستمبر 1995 کو پیدا ہوئے تھے۔
کوکین خریدنے کے الزام میں حراست میں لیے گئے آسٹریلیا کی اولمپک ہاکی ٹیم کے کھلاڑی ٹام کریگ
