کراچی(کامرس رپورٹر)یونائٹیڈ بزنس گروپ(یو بی جی)کینیڈا،امریکا کے چیئرمین نوید بخاری نے پاکستان کی معیشت پر مہنگی بجلی کے تباہ کن اثرات پر شدید تشویش کا اظہار کرتے ہوئے حکمران طبقہ سے سوال کیا کہ 40آئی پی پیز کو نوازکر ملکی خزانے کو کنگال کردینا کہاں کا انصاف ہے؟۔نوید بخاری نے کہا کہ ملک میں 25 فیصد آئی پی پیز بند ہیں،اس کے باوجود بند آئی پی پیز کوماہانہ 10ارب روپے کی ادائیگیاں کی جارہی ہیں اور بزنس کمیونٹی کی جانب سے ادا کیا جانے والا ٹیکس آئی پی پیز مافیا کے حوالے کیا جارہا ہے جس کی وجہ سے ملکی معیشت مشکلات سے دوچار ہے۔انہوں نے کہا کہ آئی پی پیز سے کیے گئے معاہدوں کی منسوخی موجودہ نازک صورتحال میں انتہائی ضروری ہے -نویدبخاری نے کہا کہ کرائے کے بجلی گھروں کے ساتھ ہونے والے معاہدے جلد بازی میں کیے گئے ہیں اور اس میں ملکی مفاد کو مدنظر نہیں رکھا گیا، کرائے کے بجلی گھروں کے مالکان کو اربوں روپے سے زائد کی رقم ایڈوانس میں دی گئی، حکومت پر زور دیا ہے کہ آئی پی پیز سے معاہدوں کا ازسر نو جائزہ لیا جائے اور بجلی کمپنیوں کا انٹرنیشنل کمپنی سے آڈٹ کرایا جائے۔
