کراچی(بزنس رپورٹر) پاکستان اسٹاک ایکسچینج (پی ایس ایکس) نے اسٹاک مارکیٹ میں سرمایہ کاری کے لیے بین الاقوامی بہترین طریقوں سے ہم آہنگ ریگولر مارکیٹ میں سرمایہ کاروں کے لین دین کے لیے کامیابی کے ساتھ ون شیئر لاٹ سسٹم میں تبدیلی کی ہے۔ اس سے پہلے لسٹڈ کمپنیوں کے لیے کم از کم قابل فروخت لاٹ سائز ان کی قیمتوں کی بنیاد پر 20، 50، 100، اور 500 حصص سے مختلف ہوتے تھے۔ سرمایہ کاروں کی سہولت کو بڑھانے اور اسٹاک مارکیٹ کے لین دین کو ہموار کرنے کے لیے یہ تبدیلی نافذ کی گئی ہے۔ پی ایس ایکس ایک فرنٹ لائن ریگولیٹر کے طور پر اپنے صارفین کے تجربے میں قدر بڑھانے اور سرمایہ کاروں اور اسٹیک ہولڈرز کو سہولت فراہم کرنے کے لیے پرعزم ہے۔ ون شیئر لاٹ میں منتقلی 19 اپریل 2024 کو شروع ہوئی اور ایک ہموار اور موثر منتقلی کو یقینی بنانے کے لیے ہفتہ وار بنیادوں پر متعدد مراحل میں عمل میں لایا گیا۔یہ تبدیلی ایکسچینج کے ذریعے کیے گئے ایک جامع تجزیے پر مبنی تھی۔نئے لاٹ سائز سے سرمایہ کاروں کے لیے بے شمار فوائد کا امکان ہے جس سے کیپٹل مارکیٹ میں ہموار، منظم اور موثر لین دین کی سہولت ہوگی۔ ون شیئر لاٹ کے اہم فوائد میں خوردہ شراکت میں اضافہ شامل ہے کیونکہ چھوٹے معیاری لاٹ سائز زیادہ قیمت والے اسٹاک کو خوردہ سرمایہ کاروں کے لیے زیادہ سستی بناتا ہے، جس کے نتیجے میں زیادہ لیکویڈیٹی اور تجارتی حجم میں بہتری آتی ہے۔ مزید برآں، یہ تبدیلی سرمایہ کاروں کو زیادہ متوازن پورٹ فولیو بنانے کی اجازت دیتی ہے کیونکہ محدود سرمایہ والے اب اسٹاک کی وسیع رینج کے متحمل ہوسکتے ہیں۔ نئے لاٹ سائز سے سرمایہ کاروں کی اوڈ لاٹ مارکیٹوں میں رعایت پر تجارت کرنے کی ضرورت بھی ختم ہو جاتی ہے جس سے رسائی کو فروغ ملتا ہے۔ مزید برآں یہ متعدد لاٹ سائزز کو ٹریک کرنے کی ضرورت کو دور کرکے سرمایہ کاروں اور سیکیورٹیز بروکرز کے لیے آپریشن کو آسان بناتا ہے، اس طرح انتظامی اور آپریشنل بوجھ کو کم کرتا ہے۔
