راولپنڈی (آن لائن) لاہور میں درج 9 مئی واقعات کی تفتیش کے دوران سابق وزیراعظم عمران خان کا پہلی مرتبہ پولی گرافک ٹیسٹ کرنے فارنزک ٹیم لاہور سے اڈیالہ جیل پہنچ گئی۔ اطلاعات کے مطابق اڈیالہ جیل پہنچنے والی پنجاب فارنزک سائنس ایجنسی (پی ایف ایس اے) ٹیم میں عابد ایوب، وقاص خالد اور علی رضا شامل ہیں۔ اس کے علاوہ 9 مئی واقعات کی تفتیش کرنے والی لاہور پولیس کی ٹیم بھی اڈیالہ جیل پہنچ گئی، ٹیم میں لاہور میں درج تمام 12 مقدمات کے تفتیشی افسران شامل ہیں، ٹیم ڈی ایس پی جاوید اقبال کی سربراہی میں اڈیالہ جیل پہنچی ہے۔ یاد رہے کہ لاہور پولیس نے عمران خان کا 10 روزہ جسمانی ریمانڈ حاصل کر رکھا ہے، لاہور ٹیم عمران خان سے کی گئی تفیش پیش رفت رپورٹ عدالت میں پیش کرے گی۔
