ڈارون(اسپورٹس ڈیسک) صاحبزادہ فرحان کی قیادت میں پاکستان شاہینز کل ڈارون میں بنگلا دیش اے کے خلاف2، 4 روزہ میچوں کی سیریز کے پہلے میچ میں مدمقابل ہونے والی ہے۔ دوسرا 4 روزہ میچ26 جولائی سے کھیلا جائے گا جس کے بعد پاکستان شاہینز 4 اور6 اگست کو2 ون ڈے اور پھر ٹاپ اینڈ ٹی ٹوئنٹی سیریز کھیلے گی۔ یہ 2008 کے بعد پہلا موقع ہے کہ پاکستان اور بنگلا دیش کی ڈیولپمنٹ سائیڈز مدمقابل ہورہی ہیں۔ 2008 میں پاکستان اکیڈمی ٹیم نے بنگلا دیش اکیڈمی ٹیم کے خلاف اسی کے میدان میں دونوں4 روزہ میچ 8 وکٹوں سے جیتے تھے۔ پاکستان شاہینز نئے ریڈ بال ہیڈ کوچ جیسن گلیسپی کی نگرانی میں حنیف محمد ہائی پرفارمنس سینٹر میں6 روزہ تربیتی کیمپ کے بعد 15 جولائی کو ڈارون پہنچی تھی۔ پاکستان شاہینز کی3 سال میںیہ تیسری ریڈ بال سیریز ہے۔ اس سے قبل اس نے 2021 اور 2023 میں سری لنکا اور زمبابوے میں4 روزہ میچوں کی سیریز کھیلی تھی۔ مہران ممتاز زمبابوے اے کے خلاف پاکستان شاہینز کے سب سے کامیاب بولر ثابت ہوئے تھے انہوں نے 2، 4 روزہ میچوں میں 15 وکٹیں حاصل کی تھیں جبکہ بیٹنگ میں عمیر بن یوسف 348 رنز کے ساتھ نمایاں رہے تھے۔ موجودہ اسکواڈ میں محمد حریرہ ، عمیر بن یوسف، کامران غلام ، حسیب اللہ ، مہران ممتاز، شاہنواز دھانی، محمد علی اور خرم شہزاد پہلے بھی ریڈ بال کرکٹ میں پاکستان شاہینز کی نمائندگی کر چکے ہیں۔ 15 رکنی ٹیم میں 3 ٹیسٹ کرکٹرز خرم شہزاد ، محمد علی اور عمر امین شامل ہیں۔ ڈارون میں بنگلا دیش اے کے خلاف2 ،4 روزہ میچ پاکستان کے آنے والے مصروف سیزن کے تناظر میں بڑی اہمیت کے حامل ہیں کیونکہ اس اسکواڈ میں شامل کھلاڑیوں کو آنے والے ریڈ بال سیزن کے لیے ضروری تجربہ اور ایکسپوژر ملے گا۔ اس سال پاکستان کرکٹ ٹیم کو بنگلا دیش، انگلینڈ، جنوبی افریقا اور ویسٹ انڈیز کے خلاف9 ٹیسٹ میچز کھیلنے ہیں۔ پاکستان شاہینز کے کپتان صاحبزادہ فرحان کا کہنا ہے کہ وہ اس سیریز میں پاکستان شاہینز کی قیادت کرتے ہوئے بہت خوش ہیں اور دلچسپ چیلنج کے منتظر ہیں جس کا سامنا ایک مختلف کنڈیشنز میں بنگلا دیش اے کی طرف سے ہوگا۔
