پڈعیدن (نمائندہ جسارت) کمشنر شہید بینظیرآباد ڈویژن سید محمد سجاد حیدر نے ڈی آئی جی شہید بینظیر آباد پرویز احمد چانڈیو،ڈپٹی کمشنر نوشہرو فیروز ارسلان سلیم اور ایس ایس پی نوشہرو فیروز کیپٹن (ر) صدام حسین خاصخیلی کے ہمراہ مرکزی امام بارگاہ حسینی مورو کا دورہ کرکے ماتمی جلوس کے روٹ کا معائنہ کیا اور سیکورٹی انتظامات کا جائزہ لیا۔ اس موقع پر کمشنر نے منتظمین سے ملاقات کرکے مسائل بھی معلوم کیے۔ اس موقع پر کمشنر کو آگاہی دیتے ہوئے امام بارگاہ کے منتظم سید پرویز علی شاہ نے بتایا کہ ضلع انتظامیہ اور پولیس کی جانب سے ہر ممکن تعاون کیا جا رہا ہے، سیکورٹی سمیت دیگر انتظامات بہتر کیے گئے ہیں جبکہ پولیس کے ساتھ ہمارے جوان بھی اسکاؤٹس میں شامل ہیں۔ انہوں نے بتایا کہ اللہ کے کرم سے آج تک کوئی بھی مسئلہ پیش نہیں آیا ہے۔ اس موقع پر چئیرمین میونسپل کمیٹی مورو نظیر احمد میمن، اسسٹنٹ کمشنر مورو محمد مستقیم اور دیگر متعلقہ افسران موجود تھے۔
