لاہور ہائیکورٹ‘ جنید افضل کا نام پی سی ایل سے نکالنے کا حکم

لاہور(نمائندہ جسارت) لاہور ہائیکورٹ نے سنی اتحاد کونسل کے رکن صوبائی اسمبلی جنید افضل ساہی کا نام پاسپورٹ کنٹرول لسٹ سے نکالنے کا حکم دے دیا۔ لاہور ہائیکورٹ کے جسٹس شمس محمود مرزا نے جنید افضل ساہی کی درخواست پر سماعت کی۔ درخواست میں وفاقی حکومت، وزارت داخلہ اور ایف آئی اے کو فریق بنایا گیا۔ درخواست میں موقف اختیار کیا کہ درخواست گزار کا تعلق حکومت مخالف سیاسی جماعت سے ہے، اس کے خلاف کسی قسم کا مقدمہ یا انکوائری زیر سماعت نہیں ہے، درخواست گزار عمرے کی ادائیگی کے لیے جانا چاہتا ہے۔ درخواست گزار کی
جانب سے استدعا کی گئی ہے میرا نام پاسپورٹ کنٹرول لسٹ سے نکالنے کا حکم دیا جائے۔ دوران سماعت اسسٹنٹ اٹارنی جنرل شیراز ذکا نے درخواست کی مخالفت کی۔