برمنگھم:ورلڈ چیمپئن شپ آف لیجنڈز میں بھارت نے پاکستان کو ہرا کر ایونٹ کا فائنل جیت لیا۔
خبر رساں اداروں کے مطابق انڈیا چیمپئنز نے ورلڈ چیمپئن شپ آف لیجنڈز 2024ء کے فائنل میچ میں پاکستان چیمپئنز کو 5 وکٹوں سے شکست دے دی۔ انڈیا چیمپئنز نے پاکستان کا 157 رنز کا ہدف آخری اوور میں حاصل کیا۔
ایجبسٹن کرکٹ گراؤنڈ میں کھیلے گئے ورلڈ چیمپئن شپ آف لیجنڈز کے فائنل میں پاکستان چیمپئنز کے کپتان یونس خان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں6 وکٹ پر 156 رنز بنائے۔
پاکستان چیمپئنز کی جانب سے شعیب ملک نے 41، کامران اکمل نے 24 اور صہیب مقصود نے 21 رنز بنائے۔ مصباح الحق نے 18 اور شرجیل خان نے 12 رنز کی اننگز کھیلی۔کپتان یونس خان اور عامر یامین 7 ،7 رنز بناکر آؤٹ ہوئے۔ سہیل تنویر 19 اور شاہد آفریدی 4 رنز کے ساتھ ناٹ آؤٹ رہے۔
بعد ازاں انڈیا چیمپئنز نے پاکستان کا 157 رنز کا ہدف آخری اوور میں 5 وکٹوں کے نقصان پر حاصل کرلیا۔
بھارت کی جانب سے امبتی رائیڈو 50، گرکریت سنگھ 34 اور یوسف پٹھان نے 30 رنز بنائے، یوراج سنگھ 15، روبن اوتھاپا 10 اور سریش رائنا 4 رنز پر آؤٹ ہوئے۔ پاکستان چیمپئنز کے عامر یامین نے 2 کھلاڑیوں کو آؤٹ کیا جبکہ سعید اجمل ، وہاب ریاض اور شعیب ملک نے1، 1 وکٹ لی۔
