کراچی (کامرس رپورٹر) ایف پی سی سی ائی پالیسی ایڈوائزری بورڈ اورنیشنل بزنس گروپ پاکستان کے چیئرمین، پاکستان بزنس مین اینڈ انٹلیکچولزفورم وآل کراچی انڈسٹریل الائنس کے صدراورسابق صوبائی وزیرمیاں زاہد حسین نے کہا ہے کہ تین سال سے جاری مہنگائی نے عوام کوتھکا ڈالا ہے۔ گزشتہ تین سال میں کوئی حکومت بھی مہنگائی کم نہیں کرسکی ہے۔ چند ماہ قبل مہنگائی میں کچھ کمی آئی تھی مگربجلی اورگیس کی قیمتوں میں اضافہ اورٹیکسوں کی بھرمارسے مہنگائی کودوبارہ بڑھایا جا رہا ہے جس سے عوام مایوس اورمشتعل ہورہے ہیں۔ میاں زاہد حسین نیکاروباری برادری سے بات چیت کرتے ہوئے کہا کہ ملکی تاریخ میں پہلی بارمہنگائی کی لہرتین سال سے جاری ہے جومستقبل میں بھی جاری رہے گی جبکہ ارباب اختیاراعداد وشمارکی شعبدہ بازیوں کے زریعے عوام کومطمئن کرنے کی کوشش کرتے رہیں گے۔ اس وقت عوام کے لئے بجلی کے بلوں کی ادائیگی مسئلہ بنی ہوئی ہے جبکہ اگلے ماہ سے تنخواہوں میں اضافی ٹیکس کی کٹوتی، بجلی کے نرخ اورفکسڈ پیمنٹ میں اضافہ اوراووربلنگ سے انکی حالت مزید خراب ہوجائے گی۔ میاں زاہد حسین نے کہا کہ سیاستدانوں اوربیوروکریسی کی غلط پالیسیوں کا خمیازہ عوام کوبھگتنا پڑرہا ہے اورتوانائی کے شعبہ میں ہرقسم کی کرپشن کا ملبہ بھی عوام پرہی ڈالا جا رہا ہے۔ اقتصادی استحکام کے نام پرعوام کا معیارزندگی ختم کرنے کا سلسلہ جاری ہے۔ کاروباربند ہورہے ہیں بے روزگاری عام ہوگئی ہے اورعوامی اشتعال بڑھ رہا ہے۔
