کوئی بیوقوف ہی سمجھتا ہوگاکہ عمران خان کو رہا کیا جائیگا،شیخ رشید

راولپنڈی( نمائندہ جسارت) عوامی مسلم لیگ کے سربراہ شیخ رشید نے کہا ہے کہ موجودہ صورتحال میں کوئی بیوقوف ہی سمجھتا ہو گا کہ بانی چیئرمین پی ٹی آئی عمران خان کو رہا کیا جائے گا۔اڈیالہ جیل کے باہر میڈیا سے گفتگو کرتے ہوئے شیخ رشید کا کہنا تھا آج کوئی فرد جرم عائد نہیں ہوئی، ساڑھے 600 لوگوں کو دھوپ میں مارا گیا۔ان کا کہنا تھا پراسیکیوٹر سے آج میری لڑائی ہوئی، پراسیکیوٹر نے کہا تھا میں یہاں پیش نہیں ہوں گا،
پراسیکیوٹر نے جج کے خلاف عدم اعتماد کیا تھا جو مسترد ہوئی۔شیخ رشید کا کہنا تھا کینیا کی فلم پاکستان میں بھی دہرائی جاسکتی ہے، 30 اگست سے پہلے حساب ہو گا۔انہوں نے کہا کہ شہباز شریف نے کہا یہ آئی ایم ایف کا بجٹ ہے، یہ آئی ایم ایف نے بنایا ہے، قوم کسی لیڈر کا انتظار نہیں کرے گی، ہر طرف بھوک ہی بھوک ہے، یہ لڑائی غریب کی لڑائی ہے حلق سے فلک تک غربت ہے۔عمران خان کی رہائی سے متعلق سوال پر شیخ رشید کا کہنا تھا کوئی بیوقوف ہی سمجھتا ہو گا کہ بانی پی ٹی آئی کو رہا کیا جائے گا، موجودہ صورتحال میں بانی پی ٹی آئی کو رہا نہیں کیا جائے گا۔یاد رہے اس سے قبل بھی شیخ رشید نے ایک بیان میں کہا تھا ابھی حالات ایسے نہیں ہیں کہ عمران خان کو رہا کیا جائے لیکن بے گناہوں کے جیلوں سے نکلنے تک عزت کے خواہشمندوں کو عزت نہیں ملے گی۔شیخ رشید کا کہنا تھا کل میں جسٹس طارق جہانگیری کی عدالت سے رہا ہوا ہوں، ایک قبر ہے مردے تین ہیں، سپریم کورٹ سے بڑا ریلیف مل سکتا ہے۔