کراچی ،اسلام آباد ،پشاور ،چارسدہ اور سوات سمیت مختلف شہروں میں زلزلے کے جھٹکے

اسلام آباد/کراچی(مانیٹرنگ ڈیسک)کراچی، اسلام آباد، راولپنڈی، پشاور، سوات چارسدہ اور مالا کنڈ سمیت خیبر پختونخوا کے مختلف شہروں میں زلزلے کے جھٹکے محسوس کیے گئے۔ زلزلے کے جھٹکے شمالی وزیرستان، پاراچنار، لوئر دیر، ہنگو اور گرد و نواح میں بھی محسوس کیے گئے۔ اس کے علاوہ چارسدہ اور صوابی میں بھی زلزلے کے جھٹکے محسوس کیے گئے۔ زلزلہ پیما مرکز کے مطابق زلزلے کی شدت 4.7 ریکارڈ ہوئی اور زلزلے کا
مرکز جنوب مشرقی افغانستان کا علاقہ تھا، زلزلے کی زیر زمین گہرائی 98 کلو میٹر ریکارڈ کی گئی۔ خیال رہے کہ چند روز قبل بھی پاکستان کے مختلف شہروں میں زلزلے کے جھٹکے محسوس کیے گئے تھے۔علاوہ ازیں شہر قائد میں زلزلے کے جھٹکے محسوس کیے گئے، شدت 3.2 تھی۔ زلزلہ پیما مرکز کے مطابق کراچی میں 9 بج کر 26 منٹ پر زلزلے کے جھٹکے محسوس کیے گئے، جن کی ریکٹر اسکیل پر شدت 3.2 ریکارڈ کی گئی۔زلزلہ پیما مرکز کے مطابق زلزلے کا مرکز کراچی کے جنوب مغرب میں 32 کلومیٹر کے فاصلے پر بحیرئہ عرب میں 42 کلومیٹر کی گہرائی میں تھا۔واضح رہے کہ رواں سال کے دوران شہر میں اب تک کم شدت کے 3 زلزلے ریکارڈ ہوچکے ہیں،اس سے قبل آنے والے 2 زلزلوں کے اثرات مضافاتی علاقوں سمیت متفرق علاقوں میں رپورٹ ہوئے تھے۔