کراچی: شہرقائد میں 6 سال بعد مین یونیورسٹی روڈ پر نیشنل ڈیٹا بیس رجسٹریشن اتھارٹی(نادرا) کے نئے رجسٹریشن سینٹر کا افتتاح کل ہوگا۔
ڈائریکٹر جنرل نادرا کراچی احتشام شاہد کا کہنا ہے کہ نادرا رجسٹریشن سینٹر صبح 8 تا رات 12 بجے تک سروسز فراہم کرے گا ،جلد ہی مختلف علاقوں میں مزید دو شفٹوں پر مشتمل بڑے رجسٹریشن سینٹر قائم کیے جائیں گے۔ نادرا رجسٹریشن سینٹر دو شفٹوں میں 700 شہریوں کو سہولیات فراہم کرے گا اور سال کے آخر تک تعداد 700 سے بڑھ کر1500 کردی جائے گی۔
ان کا کہنا تھا کہ سینٹر میں ائرکنڈیشن ہال اور پہلی منزل پر نادرا سینٹر آنے والوں کے لیے بیٹھنے کی سہولت دستیاب ہو گی جبکہ ر جسٹریشن سینٹر آنے والوں کیلئے پارکنگ کا انتظام بھی کیا گیا ہے۔
کراچی میں قائم 3 نادرا میگا سینٹر کے6 سال بعد مین یونیورسٹی روڈ ، اسکیم33گلزار ہجری، صفو رہ چورنگی کے قریب سرینا پرا ئیڈ کی بلڈنگ میں نادرا نے شہریوں کی سہولت کے لیے ایک بڑا نادرا رجسٹریشن سینٹر قائم کردیا ہے۔ جس کا افتتاح 15مئی 2024بروزبدھ صبح 9بجے نادرا کے کسی اسپیشل پرسن خصوصی افرادکے زریعے کریں گے اس موقعے پر ڈائریکٹر جنرل نادرا کراچی احتشام شاہد اور نادرا کا دیگر اسٹاف بھی موجود ہوگا۔
نادرا رجسٹریشن سینٹر کھولنے کے بعد گلشن اقبال، گلستان جوہر، صفورہ،گڈاپ، یونیورسٹی روڈ کے اطراف کہ رہائشی اور اسکیم 33 سمیت ضلع شرقی کے ملحقہ علاقوں کے شہری استفادہ حاصل کر سکیں گے۔واضح رہے کہ صفورہ چورنگی پر پہلے سے قائم نادرا کا پرانا دفتر بند کردیا گیاہے ۔
دوسری جانب نادرا نے شہریوں کے لیے نئی سہولت فراہم کردی ہے، جس کے تحت اب ڈاک خانوں سے بھی شناختی کارڈ بنوانا ممکن ہوگیا ہے۔ ملک بھر کے 83 منتخب جی پی اوز اور ڈاکخانوں میں نادرا کی سہولیات فراہمی کا آغاز کردیا گیا ہے، جہاں سے شہر ی گمشدہ شناختی کارڈ دوبارہ بنوانے، تجدید اور ترمیم کی سہولیات حاصل کر سکیں گے ۔
ڈاک خانوں میں یہ سہولیات ہفتے میں 6 دن (پیر تا ہفتہ) صبح 9 بجے سے شام 4 بجے تک دستیاب ہوں گی، تاہم جمعہ کے روز یہ سہولیات صبح 9 بجے تا دن ساڑھے بارہ بجے تک میسر ہوں گی۔
ڈاک خانوں میں دستیاب تمام سہولیات کی فیس نادرا مرکز ہی کے برابر ہوگی ۔ واضح رہے کہ پوسٹ آفسز میں این آئی سی او پی( NICOP ) بنوانے کی سہولیات میسر نہیں ہوگی ۔
بیرون ملک مقیم پاکستانیوں کے لیے قومی شناختی کارڈ این آئی سی او پی( NICOP ) (نائیکوپ) پاکستان کے شہریوں کو جاری کیا جاتا ہے جو بیرون ملک مقیم ہیں ،شہری اپنا متعلقہ جی پی او اور پوسٹ آفس نادرا کی ویب سائٹ سے چیک کر سکتے ہیں۔
