کراچی: پولیس نے بھارتی خفیہ ایجنسی کے خطرناک دہشت گردوں کو کراچی سے گرفتار کرلیا۔
نجی ٹی وی کی رپورٹ کے مطابق کراچی پولیس نے شہر قائد میں دہشت گردی کا منصوبہ ناکام بنا دیا اور بدنام زمانہ بھارتی خفیہ ایجنسی را کے 2 خطرناک دہشت گردوں کو گرفتار کرلیا۔
پولیس حکام کے مطابق کورنگی صنعتی ایریا پولیس اور حساس اداروں نے تکنیکی بنیادوں پر مشترکہ ٹارگٹڈ کارروائی کرتے ہوئے دہشت گردی اور ٹارگٹ کلنگ میں ملوث تربیت یافتہ 2 انتہائی ہائی پروفائل دہشت گردوں کو گرفتار کرلیا، جن سے 2 ہینڈ گرینیڈ، ایک 9 ایم ایم پستول اور گولیاں برآمد کی گئی ہیں۔ گرفتار دہشت گردوں کی شناخت خاور حسین ولد عبدالغنی اور جابر ولد مشتاق کے نام سے ہوئی۔
گرفتار ملزمان سے ابتدائی تفتیش کے دوران اہم انکشافات سامنے آئے ہیں۔ ملزمان بیرون ملک سے ملنے والے ٹارگٹ کی ریکی کرتے اور تمام تفصیلات و تصاویر بیرون ملک بھیجتے تھے۔ ملزمان کو مختلف غیر ملکی بینک اکاؤنٹس کے ذریعے لاکھوں روپے بھی موصول ہوچکے ہیں، ملزمان سے تفتیش جاری ہے جس میں مزید انکشافات متوقع ہیں۔
