سنی اتحاد کونسل کے رہنما اسد قیصر کا کہنا ہے کہ حکومت فارم 47 کی پیداور ہے اس کو پہلے ہی دن مسترد کر دیا تھا، اپوزیشن کے بڑے اتحاد کی خوشخبری جلد سنیں گے۔
پارلیمنٹ ہاؤس میں میڈیا سے گفتگو کرتے ہوئے سابق اسپیکر قومی اسمبلی اسد قیصر نے کہا کہ ججز کی تعیناتی کے معاملے پرترامیم قومی اسمبلی سیکرٹریٹ میں جمع کرادی، ججز کی تعیناتی امتحان کے ذریعے کی جائے، ججز کی تعیناتی سے متعلق دیگرسیاسی جماعتوں سے بھی بات کریں گے۔
اسد قیصر نے کہا کہ قائد حزب اختلاف کے معاملے پر اسپیکر قومی اسمبلی سے جلد ملاقات کروں گا، اسپیکر قومی اسمبلی قائد حزب اختلاف کا فیصلہ جلد کریں۔
اس سے قبل صوابی میں تقریب سے خطاب کرتے ہوئے اسد قیصر نے کہا کہ الیکشن میں تحریکِ انصاف کے مینڈیٹ پر ڈاکا ڈالا گیا، امریکا کے صدر نے خط میں ان کو مبارک باد نہیں دی، اس طرح کی حکومت کبھی نہیں چلے گی، یہ حکومت زیادہ سے زیادہ 6 مہینے بھی چلی تو بڑی بات ہو گی۔
پی ٹی آئی رہنما کا کہنا تھا کہ ہمارے مینڈیٹ کو چھیننے کے لیے ہر حربہ اور ہر طریقہ استعمال کیا گیا، عدالتوں سے ہمارا مینڈیٹ واپس نہ ملا تو حکومت کو کسی صورت چلنے نہیں دیں گے۔
