کراچی: صدر مملکت آصف علی زرداری منصب سنبھالنے کے بعد پہلی بار کراچی پہنچ گئے جہاں انہوں نے مزار قائد پر حاضری دی۔
صدر آصف علی زرداری راولپنڈی کے نور خان ایئربیس سے خصوصی طیارے میں روانہ ہوکر کراچی پہنچے۔ کراچی میں فیصل ایئر بیس پر وزیراعلیٰ سندھ مراد علی شاہ، گورنر سندھ اور دیگر نے صدر مملکت کا استقبال کیا۔ بعدازاں صدر مملکت آصف علی زرداری نے مزار قائد پر حاضری دی۔
انہوں نے بانی پاکستان قائد اعظم محمد علی جناح کی قبر پر پھول رکھے اور فاتحہ خوانی کی، مزار قائد پہنچنے پر صدر مملکت آصف علی زرداری کو گارڈ آف آنر پیش کیا گیا،صدر آصف علی زرداری نے بانی پاکستان کو خراج عقیدت پیش کیا۔
صدر مملکت نے مہمانوں کی کتاب میں اپنے تاثرات بھی درج کیے، اس موقع پر گورنر سندھ کامران ٹیسوری اور وزیراعلی سندھ بھی صدر مملکت کے ہمراہ موجود تھے۔صدر مملکت کی آمد پر ان کے روٹ اور مزار قائد پر سخت حفاظتی انتظامات کیے گئے تھے۔
صدر پاکستان کی سیکیورٹی سندھ پولیس کا اسپیشلائزڈ سیکیورٹی یونٹ سرانجام دے رہا ہے۔ صدر آصف علی زرداری رات کراچی کے بلاول ہاوس میں قیام کریں گے۔ صدر آصف علی زرداری بدھ کی صبح کراچی سے لاڑکانہ روانہ ہوں گے جہاں وہ ذوالفقار علی بھٹو اور بینظیر بھٹو کے مزارات پر بھی حاضری دیں گے۔۔
