روالپنڈی : چیف آف آرمی جنرل حافظ عاصم منیر کاکہنا ہے کہ پاکستان آرمی ٹیم اسپرٹ باہمی طور پر سیکھنے کے لیے صحیح فورم ہے،یہ فورم جنگ کے بدلتے ہوئے ماحول میں ٹیم کے جذبے کو فروغ دیتا ہے۔
ساتویں پاکستان آرمی ٹیم اسپرٹ مشق 2024کی اختتامی تقریب سے خطاب کرتے ہوئے آرمی چیف نے کہاکہ اس مقصد کیلیے پاک فوج نے کردار ، جرات اور صفات کو برقرار رکھا ہے،یہ تمام صفات دہشگردی کے خلاف جنگ میں ہمارے جوانوں نے بھرپور طریقے سے دکھائی ہیں۔
تقریب میں آرمی چیف نے مشق کے شرکاء کو انفرادی اور ٹیم ایوارڈزسے نوازا ، تقریب میں شرکت کرنے والے ممالک کے بین الاقوامی مبصرین اوردفاعی اتاشیوں نے شرکت کی، جنہوں نے ٹیموں کے پیشہ وارانہ طرز عمل کو سراہا۔
مشق میں پاک فوج کی7ٹیموں اوردوست ممالک نے شرکت کی،مشق میں بحرین ، اردن، قازقستان،سعودی عرب ، مالدیپ اور مراکش شامل تھیں، قطر،امریکا ، ازبکستان،سری لنکا، تھائی لینڈ اور ترکی سمیت 15ٹیموں نے حصہ لیا۔
