کراچی: پیپلز پارٹی کے رہنما اور سابق وزیراعلیٰ سندھ مراد علی شاہ نے کہا ہے کہ کراچی میں 10 نشستیں جیتنے کی پوزیشن ہے۔
انہوں نے کہا کہ پولنگ شام پانچ بجے ختم ہو چکی ہے، نتائج میں غیر معمولی تاخیر ہو رہی ہے۔ 2 گھنٹوں میں پولنگ بوتھ کی گنتی مکمل ہو جانی چاہیے تھی، تاہم رات گئے تک نتائج کا نہ آنا تشویش کا سبب ہے۔
نجی ٹی وی کی نشریات میں بات کرتے ہوئے مراد علی شاہ نے کہا کہ آر اوز نے رات 2 بجے تک نتائج دینے ہیں۔صبح 10 تک پریزائیڈنگ افسران نے نتائج دینے ہیں۔
کراچی کے حلقوں کے ابتدائی نتائج سے متعلق پوچھے گئے سوال کے جواب میں انہوں نے کہا کہ کراچی میں ہم 10 سیٹیں نکالنے کی پوزیشن میں ہیں، کراچی کی باقی 12 سیٹوں پر ایم کیو ایم اور دیگر جماعتیں جیتیں گی۔
انہوں نے مزید کہا کہ 2018 میں پی ٹی آئی کی حکومت بھی آزاد اراکین ہی کی وجہ سے قائم ہوئی تھی، ہم بھی اپنی حکومت بنانے کے لیے ان آزادامیدواروں سے رابطہ کریں گے جن کا کسی پارٹی سے تعلق نہیں۔
