عام انتخابات: نواز اور شہباز شریف شیر کے بجائے عقاب پر مہر لگائیں گے

لاہور : مسلم لیگ(ن)کے قائد نواز شریف، صدر شہباز شریف اور حمزہ شہباز عام انتخابات 2024 میں مسلم لیگ ن کے انتخابی نشان شیر کے بجائے عقاب پر مہر لگائیں گے۔

تفصیلات کے مطابق  نواز اور شہباز شریف قومی اسمبلی کا ووٹ استحکام پاکستان پارٹی (آئی پی پی)  کے امیدوار عون چوہدری کو دیں گے،  جن کا انتخابی نشان عقاب ہیں، عون چوہدری  کے حلقے میں  ن لیگ نے اپنے امیدوار کو کھڑا نہیں کیا ہے۔

دونوں بھائیوں کاووٹ این اے 128 لاہور میں رجسٹرڈ ہے، ن لیگ نے این اے 128 سے آئی پی پی کی حمایت کا اعلان کر رکھا ہے

۔ شہباز شریف کے صاحبزادے اور سابق وزیراعلی پنجاب حمزہ شہباز بھی شیر پر مہر لگانے سے محروم رہیں گے، حمزہ شہباز کا ووٹ بھی این اے 128 میں رجسٹرڈ ہے اور یہ ووٹ بھی عون چوہدری کو جائے گا۔

واضح  رہے کہ نواز شریف خود قومی اسمبلی کی نشستوں این اے 15 مانسہرہ، این اے 130 لاہور اور شہباز شریف این اے 123 لاہور، این اے 132 قصور سے انتخاب لڑ رہے ہیں۔