اسلام آباد: پاکستان اور ایران کے 17 جنوری سے معطل ہونے والے سفارتی تعلقات بحال ہو گئے ہیں جس کے بعد پاکستانی سفیر ذمہ داریاں سنبھالنے کیلئے تہران روانہ ہو گئے۔
ایک نجی ٹی وی کے مطابق پاک ایران سفارتی تعلقات معمول پر لانے کے عملی اقدامات کے تحت ایران کیلئے پاکستان کے سفیر مدثر ٹیپو تہران روانہ ہوگئے۔
تفصیلات کے مطابق مدثر ٹیپو نے ٹویٹ پیغام میں کہا کہ پاکستان کی قیادت کی مخلصانہ اور نیک خواہشات کے مطابق تہران جا رہا ہوں۔
پاکستانی سفیر کا کہنا تھا کہ دونوں ممالک کے درمیان مضبوط اور پرامن تعلقات کے فروغ کیلئے پہلے سے زیادہ پرعزم ہوں۔
واضح رہے کہ دوسری جانب پاکستان میں تعینات ایران کے سفیر کی بھی آج اسلام آباد واپسی کا امکان ہے۔
ذرائع کے مطابق باہمی تعلقات کی بحالی کے اقدامات کے تحت پاکستان نے ایرانی وزیر خارجہ کو دورے کی دعوت بھی دی تھی جو قبول کرلی گئی اور ایرانی وزیر خارجہ 29 جنوری کو پاکستان کے دورے پر پہنچیں گے۔
