ایسٹ لندن: انڈر 19 کرکٹ ورلڈ کپ کے میچ میں افغانستان کو پاکستان کے ہاتھوں 181 رنز سے شکست کا سامنا کرنا پڑا۔
خبر رساں اداروں کے مطابق جنوبی افریقا میں کھیلے گئے میچ میں پاکستان کی جانب سے ٹاس جیتنے کے بعد پہلے بیٹنگ کا فیصلہ کیا گیا، جو کامیاب ثابت ہوا۔ انڈر 19 گرین شرٹس نے 284 رنز بنائے اور اس کے 9 کھلاڑی آؤٹ ہوئے تھے۔
بعد ازاں پاکستانی ٹیم کے مجموعی اسکور کا تعاقب کرتے ہوئے افغانستان کی پوری ٹیم 103 رنز پر پویلین لوٹ گئی۔
پاکستانی اوپنر شاہ زیب خان 10 چوکوں اور 3 چھکوں کی مدد سے 106 رنز کے ساتھ نمایاں رہے، کپتان سعد بیگ نے 55 رنز بنائے، ریاض اللہ 46 اور عبید شاہ 22 رنز کے ساتھ نمایاں رہے۔ افغانستان کی جانب سے خلیل احمد نے 4 اور بشیر احمد نے 2 وکٹیں حاصل کیں۔
ہدف کے تعاقب میں افغان بیٹرز پاکستانی بولرز کے سامنے ریت کی دیوار ثابت ہوئے اور پوری ٹیم 26.2 اوورز میں 103 رنز پر پویلین لوٹ گئی۔
نعمان شاہ 26 رنز کے ساتھ ٹاپ اسکورر رہے، سہیل خان اور رحیم اللہ نے 20، 20 رنز بنائے جبکہ حسن عیسیٰ خیل نے 19 رنز کی اننگز کھیلی۔ اسکے علاوہ کوئی بھی افغان بلے باز ڈبل فگرز میں داخل نہ ہوسکا۔
پاکستان کی طرف سے عبید شاہ نے 4، محمد ذیشان نے 3، عامر حسن اور احمد حسین نے ایک ایک وکٹ حاصل کی۔ پاکستانی اوپنر شاہزیب خان کو عمدہ بیٹنگ پر مین آف دی میچ قرار دیا گیا۔
