اسلام آباد: بانی پی ٹی آئی کی اہلیہ بشریًٰ بی بی نے عدت کے دوران عدت نکاح کیس خارج کرنے کے لئے اسلام آباد ہائیکورٹ سے رجوع کر لیا۔
تفصیلات کے مطابق بشری بی بی نے بیرسٹر سلمان اکرم راجہ کے ذریعے اسلام آباد ہائی کورٹ میں درخواست جمع کرائی ہے۔
زرائع کے مطابق بشری بی بی نے درخواست میں کہا ہے کہ ایڈیشنل سیشن جج ایسٹ کا 11 جنوری کا حکم کالعدم قرار دیا جائے، عدت کے دوران نکاح کے کیس کو خارج کرنے کا حکم دیا جائے۔
درخواست میں بشری بی بی کی جانب سے کہا گیا ہے کہ درخواست پر فیصلے تک ٹرائل کورٹ کی کارروائی کو روکا جائے، سابق شوہر خاور مانیکا نے مذموم مقاصد کے لیے بدنیتی کے تحت شکایت درج کرائی، جھوٹے اور من گھڑت دستاویزات کی بنیاد پر عدت میں نکاح کا جھوٹا الزام لگایا گیا۔
زرائع کے مطابق درخواست میں بشری بی بی کا کہنا ہے کہ سابق شوہر کے مطابق اس نے مجھے 14 نومبر 2017 کو طلاق دی، خاور مانیکا نے 15 اپریل 2017 کو تین مرتبہ زبانی طلاق دی تھی، اگست 2017 میں اپنی والدہ کے گھر منتقل ہوئی، یکم جنوری 2018 کو بانی پی ٹی آئی سے شادی تک والدہ کے گھر قیام کیا۔
رپورٹس کے مطابق بشری بی بی کی درخواست میں اعلی عدالتوں کے تین فیصلوں کو بطور عدالتی نظیر بھی پیش کیا گیا ہے۔بشری بی بی کا کہنا ہے کہ عدالتوں نے قرار دیا کہ عدت میں نکاح بیقاعدہ شادی ہے جو عدت کی مدت مکمل ہونے پر باقاعدہ ہو جائے گی، عدت میں نکاح کو غیراسلامی یا شریعت کے خلاف قرار نہیں دیا گیا، تمام حقائق جانتے ہوئے قانونی و شرعی تقاضے پورے کر کے بانی پی ٹی آئی سے شادی کی، فراڈ سے شادی کرنے کا الزام درست نہیں۔
واضح رہے کہ درخواست میں استدعا کی گئی ہے کہ اعلی عدالتوں کے فیصلے موجود ہیں جس میں عدت میں نکاح کو بے قاعدہ کہا گیا، ختم نہیں کیا گیا، عدت میں نکاح کا کیس نہیں بنتا، خاور مانیکا کی شکایت خارج کی جائے۔
