لاہور: چیئرمین پیپلز پارٹی بلاول بھٹو زرداری نے ورکرز کنونشن میں ن لیگ کے قائد نواز شریف پر سخت تنقید کی ہے۔
رائیونڈ میں ہونے والے پیپلز پارٹی کے ورکرز کنونشن سے خطاب کرتے ہوئے چیئرمین پیپلز پارٹی اورسابق وزیر خارجہ بلاول بھٹو زرداری نے کہا کہ اگر عوامی حکومت چاہیے تو یہ ن لیگ نہیں بنا سکتی، عوامی حکومت صرف شہیدوں کی پارٹی ہی بنا سکتی ہے۔نواز شریف پر تنقید کرتے ہوئے بلاول بھٹو نے کہا کہ یہ تو خود لندن بھاگ جاتے ہیں جب انہیں دل کی تکلیف ہوتی ہے، ہم نے ان سے تب بھی کہا تھا کہ اتنی دور جانے کی کیا ضرورت؟ کراچی آ جائیں جہاں ہم نے این آئی سی وی ڈی بنایا ہے۔
انہوں نے کہا کہ عوام سے سوال کیا جائے کہ کیا وہ بجلی کا بل دے سکتے ہیں تو جواب ملے گا نہیں۔ مگر ہم جھوٹ، نفرت، گالی اور تقسیم کی سیاست نہیں کرتے۔ ہم نے 10 نکاتی ایجنڈے کا اعلان کیا ہے، جو عوام دوست ہے۔ ہم تحریک انصاف یا مسل ملیگ ن کی طرح جھوٹے وعدے نہیں کرتے۔ ہم پنجاب بھر میں علاج کے لیے مفت اور معیاری مراکز قائم کریں گے۔
بلاول بھٹو زرداری کا کہنا تھا کہ اقتدار میں آکر عوام کو 300 یونٹ تک بجلی مفت دیں گے۔ مفت معیاری تعلیم کا بھی پیپلز پارٹی وعدہ کرتی ہے اور اسی طرح صحت کی سہولیات بھی مفت ہی فراہم کی جائیں گی۔
