لاہور: پاکستان تحریک انصاف (پی ٹی آئی) کے رہنما و سینئر نائب صدر شیر افضل مروت کو لاہور ہائی کورٹ (ایل ایچ سی) کے باہر سے گرفتار کر لیا گیا ۔
شیر افضل وکلاء کنونشن میں شرکت کے بعد ہائی کورٹ کے احاطے سے نکل رہے تھے کہ پولیس کی بھاری نفری نے انہیں گرفتار کر لیا۔
پولیس کے مطابق پی ٹی آئی رہنما کو تھری ایم پی او کے تحت گرفتار کرکے تھانہ مزنگ منتقل کردیا گیا۔
گزشتہ ہفتے، پی ٹی آئی رہنما نے الزام لگایا کہ کے پی پولیس نے باجوڑ میں پارٹی کنونشن کے لیے چکدرہ کے قریب گل آباد جاتے ہوئے “اغوا” کی کوشش کی۔
اس سے قبل صوابی میں ورکرز کنونشن کے انعقاد پر پاکستان تحریک انصاف (پی ٹی آئی) کے سینئر نائب صدر شیر افضل خان مروت اور دیگر کے خلاف فرسٹ انفارمیشن رپورٹ (ایف آئی آر) درج کی گئی تھی۔
اکتوبر میں، سوشل میڈیا کے ذریعے عوام کو ریاستی اداروں کے خلاف اکسانے پر ان کے خلاف خیبر پختونخواہ (K-P) میں مقدمہ درج کیا گیا تھا۔
ان کے خلاف الزامات پاکستان پینل کوڈ کی دفعہ 120-B (مجرمانہ سازش کی سزا) اور 153-A (مختلف گروہوں کے درمیان دشمنی کو فروغ دینا) کے تحت عائد کیے گئے۔
گزشتہ ماہ اسلام آباد ہائی کورٹ (IHC) نے پاکستان تحریک انصاف کے سینئر نائب صدر شیر افضل مروت کی خیبر پختونخواہ (KP) میں ان کے خلاف درج دو مقدمات میں حفاظتی ضمانت منظور کر لی تھی۔
