امریکی وزیر خارجہ انتھونی بلنکن کا کہنا ہے کہ امریکا ایران کے ساتھ جنگ نہیں چاہتا اور اپنے فوجیوں پر حملے برداشت نہیں کرے گا۔
غیر ملکی خبر رساں ادارے کے مطابق ایران کی اتحادی عراقی ملیشیا نے شام میں امریکی اڈے پر ڈرون حملوں اور عراق میں الاسد بیس پر مارٹر حملوں کی ذمہ داری قبول کر لی ہے۔
دوسری جانب امریکی وزیر خارجہ انتھونی بلنکن عراق کے بعد ترکی پہنچ گئے ہیں۔
اس موقع پر امریکہ اور شام میں فوجی اڈوں کو نشانہ بنائے جانے پر ردعمل کا اظہار کرتے ہوئے امریکی وزیر خارجہ نے کہا کہ امریکہ ایران کے ساتھ جنگ نہیں چاہتا اور اپنے فوجیوں پر حملوں کو برداشت نہیں کرے گا۔
ادھر اسرائیل مخالف مظاہرین نے ترکی کے شہر ادانا میں امریکی اڈے میں داخل ہونے کی کوشش کی تاہم پولیس نے انہیں آنسو گیس کے گولے داغ کر روک دیا۔
