راولپنڈی:نگراں وزیر اعظم کی مشیر برائے انسانی حقوق مشعال ملک نے کہا ہے کہ بھارت اور اسرائیل کی دہشت گردی دنیا بھر میں پھیل رہی ہے۔
گزشتہ 12 روز سے فلسطین پر قیامت ٹوٹی ہوئی ہے۔ ہر کوئی خون کے آنسو رو رہا ہے۔ دنیا اسرائیل پر معاشی اور دفاعی پابندی لگائے۔
راولپنڈی چیمبر میں میڈیا سے گفتگو کرتے ہوئے مشعال ملک نے کہا کہ گزشتہ 12 روز سے فلسطین پر قیامت ٹوٹی ہوئی ہے۔ ہر کوئی خون کے آنسو رو رہا ہے۔ روزانہ کی بنیاد پر اسرائیلی فوج فلسطینی بچوں کو قتل کر رہی ہے۔ ہر 15 منٹ بعد ایک فلسطینی بچے بچہ شہید ہو رہا ہے۔ 12 روز سے فلسطینی کھانے پینے کی اشیاء،ادویات اور پانی کی ترسیل سے محروم ہیں۔
انہوں نے کہا کہ اسرائیل کی جانب سے وائٹ فاسفورس کا استعمال کرکے فلسطینی عوام کی پراپرٹی کو تباہ کیا جا رہا ہے۔ دنیا اسرائیل پر معاشی اور دفاعی پابندی لگائے۔
اسرائیل اور بھارت جو کرتے ہیں وہ دنیا میں کبھی نہیں دیکھا۔ فلسطین اور کشمیر کھلی جیل ہیں،سب سے زیادہ جینوسائیڈ فلسطین میں ہو رہا ہے۔ اسرائیلی افواج ہر جنگ میں فلسطینی بچوں کو قتل کرنے کے واقعات بڑھا رہی ہے۔
انہوں نے کہاکہ فلسطین میں 5 سے 6 ہزار لوگ شہید کیے جا چکے ہیں۔ اسرائیلی جارحیت کے دنیا پر بڑے اثرات آنے والے ہیں۔ پیٹرولیم مصنوعات کی قیمتوں پر بھی اثرات آئیں گے۔
انہوں نے کہا کہ اسرائیل نے ایک نئی مثال قائم کی کہ وہ جو مرضی کرے، دنیا اسے کچھ نہیں کہہ سکتی اور نہ روک سکتی ہے۔ دنیا سے کوئی مضبوط و توانا آواز نہیں آ رہی جو اسرائیل کو روک سکے۔
انہوں نے سوال کیا کہ کیا دنیا میں کوئی بھی نہیں جو اسرائیل کو جنگی جرائم سے روک سکے؟۔
نگراں وزیراعظم کی مشیر انسانی حقوق نے غزہ کے اطراف کی سرحدوں کو کھولنے کا مطالبہ کرتے ہوئے کہا کہ عالمی مبصرین کو وہاں تک جانے کی اجازت دی جائے۔ پاکستانی عوام فلسطینیوں اور کشمیری عوام کے ساتھ ہیں۔ فلسطین میں فوری طور پر جنگ بندی ہونی چاہیے۔ نیتن یاہو،مودی کا نیکسس ایکسپوز ہو رہا ہے۔ فلسطینی عوام کو کہا جا رہا ہے کہ یہاں سے نکل جائیں،فلسطینی عوام کیوں اپنی جگہ چھوڑیں۔
انہوں نے کہا کہ افغانستان میں ایک سال میں جو کچھ کیا گیا، فلسطین میں کارپٹ بمبنگ کرکے 2 دن میں اتنا نقصان کر دیا۔ گیا۔ ہندوتوا کے ذریعے دہشت گردی پھیلائی جا رہی ہے۔ جنیوا معاہدے کی کھلی خلاف ورزیاں جاری ہیں۔ اس معاملے میں صرف مذمت کافی نہیں،امن افواج کہاں ہیں۔ دنیا میں مذہبی ہم آہنگی کے قائدین کو آگے بڑھ کر کردار ادا کرنا چاہیے۔
انہوں نے کہا کہ فلسطین جنگ کو روکنے کے لیے دنیا بھر سے آواز آئی چاہیے۔ فلسطین جنگ نہ رْکی تو عالمی معیشت تباہ ہونے کے خدشات موجود ہیں۔
انہوں نے کہا پاکستان ہمیشہ فلسطینی عوام کے ساتھ ہے۔ یہ معاملہ رکنے والا نہیں ہے۔ اسرائیل کی دہشت گردی دنیا بھر میں پھیل رہی ہے۔
