اسلام آباد: توشہ خانہ کیس سے متعلق عمران خان کی اپیلیں سماعت کے لیے مقرر کرلی گئیں۔
نجی ٹی وی کی رپورٹ کے مطابق عدالت عظمیٰ نے سابق وزیراعظم اور چیئرمین پی ٹی آئی عمران خان کی توشہ خانہ کیس کے حوالے سے اپیلیں سماعت کے لیے مقرر کرلی ہیں اور اس سلسلے میں بینچ تشکیل دے دیا گیا ہے۔
چیف جسٹس آف پاکستان عمر عطا بندیال کی سربراہی میں سپریم کورٹ کا 3 رکنی بینچ 23 اگست کو عمران خان کی توشہ خانہ کیس سے متعلق اپیلوں پر سماعت کرے گا۔ بینچ میں چیف جسٹس کے علاوہ جسٹس مظاہر نقوی اور جسٹس جمال مندوخیل شامل ہیں۔
یاد رہے کہ اسلام آباد ہائی کورٹ نے توشہ خانہ کیس قابل سماعت ہونے کا معاملہ جج ہمایوں دلاور کو واپس بھجوا دیا گھا، جس پر چیئرمین پی ٹی آئی عمران خان کی جانب سے اسلام آباد ہائی کورٹ کے 3 اگست کے فیصلوں کو سپریم کورٹ میں چیلنج کیا گیا تھا۔
