اسلام آباد: وفاقی دارالحکومت سمیت ملک کے کئی علاقوں میں زلزلے کے شدید جھٹکے محسوس کیے گئے۔
خبر رساں اداروں کے مطابق پنجاب، خیبرپختونخوا کے مختلف علاقوں میں تقریباً رات 9 بجے زلزلے کے شدید جھٹکے محسوس کیے گئے۔ ریکٹر اسکیل پر زلزلے کی شدت 5.7 ریکارڈ کی گئی ہے۔
اسلام آباد، راولاکوٹ آزاد کشمیر، پنڈ دادن خان، ہری پور، واہ کینٹ سمیت ملک کے مختلف علاقوں زلزلے کے شدید جھٹکے محسوس کیے گئے۔ علاوہ ازیں خیبرپختونخوا کے دارالحکومت پشاور سمیت مختلف اضلاع میں بھی زلزلے کے شدید جھٹکے محسوس کیے گئے۔ دریں اثنا دیر بالا، باجوڑ، بونیر، چترال، نوشہرہ میں بھی زلزلے کے جھٹکے محسوس کیے گئے۔
زلزلے کے باعث شہری خوف کے عالم میں کلمہ طیبہ اور استغفار کا ورد کرتے ہوئے محفوظ مقامات کی طرف چلے گئے۔ زلزلہ پیما مرکز کے مطابق ریکٹر اسکیل پر زلزلے کی شدت 5.7 ریکارڈ کی گئی تاہم اس کا دورانیہ کم وقت رہا۔ رپورٹ کے مطابق زلزلے کا مرکز کوہ ہندوکش افغانستان میں تھا۔
اب تک ملک بھر سے کسی بھی جانی اور مالی نقصان کی اطلاع موصول نہیں ہوئی ہے۔ ریسکیو 1122 خیبرپختونخوا کے مطابق امدادی کارکنوں کو متاثرہ علاقوں کی طرف بھیج کر عملے کو الرٹ بھی کردیا گیا ہے۔
