کراچی: سندھ پریمیئر لیگ میں ایک اور فرنچائز کراچی غازیز کا اضافہ ہوگیا۔
اس سلسلے میں مقامی ہوٹل میں باہمی مفاہمت کی یادداشت پر دستخط کی تقریب منعقد ہوئی، جس میں وزیر بلدیات سید ناصر حسین شاہ مہمان خصوصی تھے۔ وزیر اعلیٰ سندھ کے معاون خصوصی ارباب لطف اللہ بھی خاص مہمان کی حیثیت سے مدعو تھے۔
تقریب سے خطاب میں ناصر حسین شاہ نے کہا کہ سندھ حکومت کا لیگ کی سرپرستی کا مقصد صوبے سے باصلاحیت اور اہل کھلاڑیوں کو تربیت کے مواقع فراہم کرنا ہے تاکہ وہ مستقبل میں اپنی کارکردگی دکھا کر ملک و قوم کا نام روشن کریں۔ انہوں نے کہا کہ صوبے بھر میں کھیلوں کی بہتر سہولیات فراہم کر رہے ہیں۔
ارباب لطف اللہ کا کہنا تھا کہ لیگ کو صوبے کے دیگر شہروں میں لے کر جائیں گے۔ دوسرا ایڈیشن سکھر میں ہو گا۔ سندھ سےشاہ نواز دھانی جیسے ٹیلنٹ کو سامنے لائیں گے۔ تقریب میں ایس پی ایل کے صدر عارف ملک نے استقبالی کلمات ادا کیے۔ تقریب میں کراچی پولیس چیف جاوید اوڈھو اور دیگر بھی موجود تھے۔
