کراچی: سندھ میں نئے ٹیلنٹ کی تلاش کے لیے پشاور زلمی ٹیلنٹ ہنٹ جمعہ سے کراچی میں شروع ہوگا۔
راشد لطیف اکیڈمی گراؤنڈ، گلبرگ پرسابق ٹیسٹ کپتان اور پشاور زلمی کے صدر انضمام الحق، سابق قومی کپتان راشد لطیف، ڈائریکٹر کرکٹ محمد اکرم اور سابق ٹیسٹ وکٹ کیپر بیٹرکامران اکمل ٹرائلز لیں گے۔
پروگرام کے تحت 21 جولائی کو کراچی ریجن،22 جولائی کو حیدر آباد اور لاڑکانہ ریجن کے ٹرائلز طے ہیں۔ 30 جولائی کوشارٹ لسٹ پلئیرز کےدرمیان میچ ہوگا۔پشاور زلمی ڈیجیٹل پلیٹ فارم پر ٹرائلز کے حوالے سے رجسٹریشن کا آغاز کردیا گیا ہے۔رجسٹریشن کے بعد نوجوان کرکٹرز اوپن ٹرائلز میں شریک ہوسکیں گے۔
دریں اثناپشاور زلمی کے چیئرمین جاوید آفریدی نے کہا ہےکہ پشاور زلمی پورے پاکستان کے نوجوان کرکٹرز کو صلاحیتوں کے اظہار کا موقع دینا چاہتی ہے۔ پشاور کے بعد کراچی میں اوپن ٹرائلز سے نیا ٹیلنٹ سامنے آئیگا۔ بعدازاں ملک کے دیگر صوبوں اور شہروں میں بھی اوپن ٹرائلز منعقد کریں گے۔
