لاہور:پاکستان تحریک انصاف کے رہنما اور سابق وفاقی وزیر فواد چوہدری نے کہا ہے کہ لاہور نے بہت عزت دی لیکن عمران خان کو حاضری پر مجبور کرکے انتہائی زیادتی کی گئی۔
سماجی رابطے کی ویب سائٹ ٹوئٹر پر اپنے پیغام میں رہنما پی ٹی آئی فواد چوہدری نے کہا ہے کہ عمران خان کی سکیورٹی اور میڈیکل دونوں کو شدید خطرے میں ڈالا گیا، صرف ایک دھکا دوبارہ فریکچر کیلئے کافی تھا، جعلی میڈیکل رپورٹ پر فرار نواز شریف کو بلایا نہیں اور عوام کے لیڈر سے ایسا سلوک؟۔اپنے ایک اور ٹوئٹ میں فواد چوہدری نے کہا کہ اوورسیز پاکستانیوں سے پی ڈی ایم حکومت کا سلوک شرمناک ہے، دبئی کے ٹکٹ میں 50 ہزار اور شارجہ کے ٹکٹ میں 75 ہزار روپے کا ٹیکس لگا دیا گیا۔
سابق وفاقی وزیر اطلاعات نے کہا کہ امریکہ جانے والے اڑھائی لاکھ، لندن اور یورپ جانے والے ڈیرھ لاکھ روپے تک ٹیکس بھریں گے، پاکستان میں رہنے والے اور اوورسیز سب اس حکومت سے تنگ ہیں۔
