اسلام آباد:وفاقی وزیر برائے اطلاعات ونشریات مریم اورنگزیب نے کہا ہے کہ ملک کے قانون کو جنگل کا قانون بنانے والے نے دو دن سے آئین، قانون کو یرغمال بنایا ہوا ہے، آج یہ تماشا پوری قوم اور دنیا دیکھ رہی ہے۔
مریم اورنگزیب نے کہاکہ انصاف اور قانون کا پورا نظام ایک شخص کی ضد، انا اور تکبر کے سامنے بے بس نظر آتا ہے، ایک ذہنی مریض کی انا آئین، قانون، عدالت سمیت ہر چیز سے بڑی ہے۔
مریم اورنگزیب کا کہنا تھا کہ اللہ کی شان کہیں یا مکافات عمل! سیاسی مخالفین کی بیماریوں، پلیٹ لیٹس،ہسپتال میں آخری سانس لیتے مریضوں اور ان کے اہل خانہ کے احساسات کا تمسخر اڑانے والا آج “بزرگ” اور “بیمار” بن گیا ہے۔
انہوں نے مزید کہاکہ ایک شخص اپنی ضد، انا اور تکبر میں آئین، قانون، کسی جج اور عدالت کو ماننے کو تیار نہیں۔
