لاہور: پاکستان سپر لیگ (پی ایس ایل( میں قومی فاسٹ بولر شاہین شاہ آفریدی آٹھویں سیزن میں لاہور قلندر ٹیم کی قیادت کریں گے،لاہور قلندرز کے سی او او ثمین رانا کا کہنا ہے کہ پی ایس ایل 8 کے لیے شاہین آفریدی مکمل فٹ ہوں گے۔
لاہور قلندرز کے سی او او کا کہنا تھا کہ قومی ٹیم کے فاسٹ بولر شاہین شاہ آفریدی فٹ ہیں اور اسکواڈ کے ہمراہ ٹریننگ کررہے ہیں جبکہ فرنچائز کی پی ایس ایل 8 میں قیادت کے فرائض سرانجام دیں گے۔
ثمین رانا نے کہا کہ چیمپئن ہونے کی وجہ سے لاہور قلندرز پر کوئی دباؤ نہیں، لاہور قلندرز دباؤ میں نہیں آتی کیونکہ ٹیم نے پی ایس ایل میں برا وقت بھی دیکھا ہوا ہے اس لیے اب چیمپئن ہیں تو پر امید ہیں ٹائٹل کا دفاع کریں گے اور پہلی ٹیم بننا چاہیں گے جس نے ٹائٹل کا دفاع کیا ہو گا۔
سی او او لاہور قلندرز نے مزید کہا کہ متوازن سائیڈ بنانے کی کوشش کی ہے، بالنگ ہماری طاقت ہے، ٹیم کے کمبی نیشن سے مطمئن ہیں، بہترین ٹیم بنانے کی کوشش کی ہے، اس میں توازن رکھا ہے، بولنگ ہماری اسٹرنتھ ہے لیکن بیٹرز بھی ورلڈ کلاس ہیں، سمت پٹیل کی جگہ لیام ڈاؤسن جب کہ محمد حفیظ کی جگہ سکندر رضا کو لیا ہے۔
انہوں نے پاکستان کرکٹ بورڈ (پی سی بی) کے چیئرمین نجم سیٹھی کی بھی تعریف کی اور امید ظاہر کی کہ لیگ ان کی قیادت میں مزید کامیاب ہوگی۔ انہوں نے مشکل وقت میں پی ایس ایل کا آغاز کیا اور پی ایس ایل کو ان جیسے ایڈمنسٹریٹر کی ضرورت ہے۔
خیال رہے کہ پاکستان سپر لیگ کا 8 ویں ایڈیشن کا آغاز 13 فروری کو ہوگا۔
