کراچی:امیرِ جماعتِ اسلامی کراچی حافظ نعیم الرحمن نے کہا ہے کہ کراچی کے عوام چاہتے ہیں کہ یہاں بلدیاتی الیکشن ہوں جو ان کا آئینی حق ہے، ہم چیف جسٹس پاکستان کو اس حوالے سے خط لکھیں گے۔
پریس کانفرنس کرتے ہوئے حافظ نعیم الرحمن نے کہا کہ کل صوبائی حکومت نے ایک بار پھر الیکشن کمیشن کو خط لکھ دیا، کہا گیا کہ حلقہ بندیاں کرنی ہیں۔حافظ نعیم الرحمن نے کہا کہ خط میں حلقہ بندیوں سے متعلق ایم کیو ایم کا جواز بتایا گیا ہے، یہ خوف کھاتے ہیں کہ ہار جائیں گے، ان کے سسٹم میں شامل نہیں کہ اختیارات نچلی سطح پر منتقل کیے جائیں۔
انہوں نے کہا کہ تمام پارٹیاں الیکشن سے بھاگتی ہیں اور چاہتی ہیں کہ مل بانٹ کر کھاتے رہیں، ہائی کورٹ نے فیصلہ دیا کہ الیکشن ہوں لیکن بارشوں کو جواز بنا کر ملتوی کر دیے گئے، آپ ہم سے خوف کیوں کھا رہے ہیں، الیکشن کرائیں، الیکشن کمیشن کی ذمے داری ہے کہ اس معاملے پر تمام اسٹیک ہولڈرز کو بلائے، شفاف الیکشن کرائے، جو جیتے گا ہم اسے مبارک باد دیں گے،گوادر اور بلوچستان کے عوام کی پریشانیوں کو حکومت کو دور کرنا چاہیے۔
