کراچی: پی ایس ایل 8 کے لیے کھلاڑیوں کی ڈرافٹنگ کل جمعرات کو پہلی بار کراچی میں ہوگی۔
ڈیفنس اتھارٹی کنٹری اینڈ گالف کلب میں ہونے والی ڈرافٹنگ کے لیے 433 غیرملکی کرکٹرز اپنی آمادگی ظاہرکرچکے ہیں، جن میں افغانستان کے راشد خان اور مجبیب الر حمان، بنگلا دیش کے شیکب الحسن، جنوبی افریقا کے ڈیوڈ ملز، انگلینڈ کے ڈیوڈ ملان، سری لنکا کے ونندو ہسارنگا، انگلینڈ کے الیکس ہیلز، آسٹریلیا کے ایرون فنچ اور نیوزی لینڈ کے جمی نیشم بھی شامل ہیں۔
علاوہ ازیں ہالینڈ کے 15 ، اسکاٹ لینڈ کے 10، متحدہ عرب امارات کے 25 اور کینیڈا کے 10 کرکٹرز بھی اس سیزن میں دلچسپی ظاہر کر چکے ہیں۔ افغانستان کے 43، آسٹریلیا کے 14، بنگلا دیش کے 28، انگلینڈ کے 139، آئرلینڈ کے 9، نیوزی لینڈ کے 6، جنوبی افریقا کے 25، سری لنکا کے 60، ویسٹ انڈیر کے 38 اور زمبابوے کے 11 کھلاڑی بھی چناؤ کے خواہش مند ہیں۔
واضح رہے کہ پی ایس ایل کا آٹھواں ایڈیشن 9 فروری تا 19 مارچ لاہور، ملتان، کراچی اور راولپنڈی میں کھیلا جائے گا جبکہ لاہور قلندر دفاعی چیمپئن ہے۔ ڈارفٹنگ میں تمام 6 فرنچائزز کے ذمے داران اور ان کے نامزد کھلاڑی چناؤ کے عمل میں شریک ہوں گے۔
اسلام آباد یونائیٹڈ، کراچی کنگز، لاہور قلندرز، پشاور زلمی، ملتان سلطانز اور کوئٹہ گلیڈی ایٹرز کو اپنے 8 کھلاڑی برقرار رکھنے کا استحقاق حاصل ہوگا جب کہ کھلاڑیوں کو دوسری ٹیموں کے کھلاڑی سے تبدیل کا حق بھی میسر آئے گا۔
اسلام آباد یونائیٹڈ میں شاداب خان،آصف علی،محمد وسیم جونیئر،حسن علی،اعظم خان،فہیم اشرف،پاؤل سٹیرلینگ،کولین منروو شامل ہیں۔
کراچی کنگز میں حیدرعلی،شعیب ملک،عماد وسیم،محمد عامر،شرجیل خان،عامریاسین،قاسم اکرم شامل ہیں۔
لاہور قلندر میں شاہین شاہ آفریدی،راشد خان،حارث رؤف،ڈیوڈ وائس،عبداللہ شفیق، کامران غلام،ہیری بروک خان،زمان خان شامل ہیں۔
ملتان سلطانز میں محمد رضوان،شان مسعود،خوشدل شاہ،ریلی روسو،شاہنوازدھانی،ٹم ڈیوڈ،احسان اللہ،عباس آفریدی شامل ہیں۔
پشاور زلمی میں بابراعظم،وہاب ریاض،روتھ فورڈ،محمد حارث،عامرجمیل،ٹام کوہلر،سلمان ارشد شامل ہیں
جب کہ کوئٹہ گلیڈی ایٹر میں محمد نواز،جوسن رائے،افتخاراحمد،محمد حسنین،سرفراز احمد،عامراکمل،نوین الحق،ویل صمد شامل ہوں گے۔
