سابق وزیراعظم نوازشریف نے پلاٹ الاٹمنٹ کیس سے بریت کیلئے احتساب عدالت لاہور میں درخواست دائر کرتے ہوئے کہا ہے کہ نیب ترمیمی ایکٹ کے تحت نیب کو 50کروڑ روپے سے کم مالیت کیس میں کارروائی کا اختیار نہیں جبکہ میرے خلاف دائر ریفرنس میں 13کڑور کی کرپشن کا الزام عائد کیا گیا ہے۔
سابق وزیر اعظم اور مسلم لیگ( ن) کے قائد نوازشریف نے احتساب عدالت لاہور میں پلاٹ الاٹمنٹ کیس میں اشتہاری قرار دینے کے خلاف درخواست دائر کردی جس میں موقف اختیار کیا گیا ہے کہ نیب ترمیمی ایکٹ کے تحت نیب کو 50کروڑ روپے سے کم مالیت کیس میں کارروائی کا اختیار نہیں۔درخواست گزار کے خلاف دائر ریفرنس میں 13کروڑ روپے کی کرپشن کا الزام عائد کیا گیا ہے، احتساب عدالت تین ملزمان کو پہلے ہی بری کرنے کا حکم دے چکی ہے۔
درخواست گزار نے استدعا کی کہ نیب ترمیمی ایکٹ کے تحت عدالت نواز شریف کے خلاف کارروائی ختم کرے۔عدالت نے نواز شریف کو اشتہاری قرار دے کر جائیداد ضبط کرنے کا حکم دے رکھا ہے۔خیال رہے کہ نیب ایکٹ میں ترمیم کی گئی ہے جس کے تحت نیب کو اب 50 کروڑ روپے سے کم مالیت کے کیس میں کارروائی کا اختیار نہیں ہے۔
