اسلام آباد: وزیراعظم شہباز شریف نے ہیلی کاپٹر میں لاپتا ہونے والے فوجی افسران کے لیے تشویش کا اظہار کرتے ہوئے کہا ہے کہ لیفٹیننٹ جنرل سرفراز علی بہترین پروفیشنل اور نہایت اچھے انسان ہیں،دعاگو ہوں کہ ہیلی کاپٹر میں سوار تمام لوگ بحفاظت ہوں۔
تفصیلات کے مطابق وزیراعظم شہباز شریف نے آرمی چیف جنرل قمر جاوید باجوہ سے ٹیلی فون پر گفتگو کی، جس میں انہوں نے گزشتہ روز ہیلی کاپٹر میں لاپتا ہونے والے فوجی افسران کے لیے تشویش کا اظہار کیا کہ وطن کے ان بہادر بیٹوں کی بحفاظت واپسی کے لیے خصوصی دعا کریں، پوری قوم اس حادثے پر انتہائی مغموم اور افسردہ ہے۔
وزیراعظم نے آرمی ایوی ایشن کے لاپتا ہیلی کاپٹر سے متعلق تازہ ترین معلومات حاصل کیں اور 12 کور کے کمانڈر لیفٹیننٹ جنرل سرفراز علی سمیت فوج کے 6 افسران اور جوانوں کی سلامتی سے متعلق اپنی فکرمندی کا اظہار کیا۔
وزیراعظم نے کہا کہ لیفٹیننٹ جنرل سرفراز علی بہترین پروفیشنل اور نہایت اچھے انسان ہیں،دعاگو ہوں کہ ہیلی کاپٹر میں سوار تمام لوگ بحفاظت ہوں۔
انہوں نے قوم سے اپیل کی کہ وطن کے ان بہادر بیٹوں کی بحفاظت واپسی کے لیے خصوصی دعا کریں۔وزیراعظم نے کہا کہ پوری قوم اس حادثے پر انتہائی مغموم اور افسردہ ہے۔
آرمی چیف سے گفتگو میں وزیراعظم نے سیلاب زدگان کے لیے امدادی کارروائیوں پر خراج تحسین پیش کرتے ہوئے کہا کہ یہ فرض شناس بیٹے خدمت کی اعلی مثال بن کر سامنے آئے ہیں۔ یہ ہے اپنے بھائیوں، بہنوں، بچوں کی خدمت کا وہ عظیم جذبہ جو پاکستان کی حقیقی طاقت ہے ۔
آرمی چیف نے گزشتہ شب سے جاری تلاش کی کارروائیوں سے متعلق وزیراعظم کو آگاہ کیا۔a
