اسلام آباد (صباح نیوز) مسلم لیگ (ن) کی ترجمان مریم اورنگزیب نے کہا ہے کہ فرح گجر باہر گئی نہیں بلکہ انہیں عمران خان نے باہر بھگایا ‘ آئین پر حملہ آور کرسی سے چمٹے ہیں۔ اسلام آباد میں میڈیا سے گفتگو کرتے ہوئے مریم اورنگزیب نے کہا کہ 22 کروڑ عوام کی نظریں اس وقت عدالت عظمیٰ پر ہیں، عدالت عظمیٰ میں آئین شکنی سے متعلق کیس کی سماعت چل رہی ہے‘ آئین پر حملہ کرنے والے ریاستی طاقت استعمال کر کے کرسی سے چمٹے ہیں۔انہوں نے کہا کہ عمران خان لیٹر گیٹ کمیشن کی فضول باتیں بند کریں‘ عوام نے دیکھا کوئی خط تھا ہی نہیں‘ بیرون ملک کی سازش کا 7 مارچ کو پتا چلا تو 3 اپریل کا انتظار کیوں کیا؟ اسپیکر نے 8 مارچ کو تحریک کیوں لی۔ انہوں نے کہا کہ عمران خان نے آٹا، چینی، بجلی اور گیس کی چوری کی، یہ لوگ کرپشن کا بیانیہ لے کر الیکشن لڑے تھے، ان کو لوگوں نے نالائقی کی وجہ سے چھوڑا ہے‘ عوام آٹے، چینی کی مہنگائی کا پوچھتے ہیں تو گالی دیتے ہیں‘ عوام گیس، بجلی 3، 3 گنا زیادہ قیمتوں پر خرید رہے ہیں۔ انہوں نے کہا کہ مسلم لیگ(ن) الیکشن کے لیے تیار ہے‘ متحدہ اپوزیشن نے ملک کو عمران خان سے بچایا ہے‘ قانون ان آئین شکنوں کو الیکشن لڑنے کی اجازت نہیں دے گا۔ انہوں نے کہا کہ الیکٹرونک ووٹنگ مشین کو پی ٹی آئی اور عمران خان نے متعارف نہیں کرایا، ہر منصوبے کے اوپر نواز شریف اور شہباز شریف کی مہر ہے۔ ترجمان (ن) لیگ کا کہنا تھا کہ صدر کا خط آئین شکنی کا خط ہے‘ خط کی کوئی آئینی حیثیت نہیں‘ عارف علوی کو کہنا چاہتی ہوں کہ آپ کو پتا ہے کہ آرٹیکل 6 میں سزا کیا ہے، تیار رہیں۔ انہوں نے کہا کہ مطیع اللہ سینئر صحافی ہیں، ان سے بدتمیزی کی گئی‘ فواد چودھری پیکا آرڈیننس لانے میں سرفہرست ہیں، ان سے کوئی سوال کرو تو گالی دیتے ہیں، صحافیوں کے خلاف استعمالکییگئے الفاظ کی مذمت کرتی ہوں۔
