اسلام آباد (صباح نیوز)وفاقی وزیر داخلہ شیخ رشید احمدنے وزیر اعظم عمران خان سے کہا ہے کہ تھوڑے عرصے کی بات ہے، آئندہ الیکشن میں آپ کی مقبولیت مزید بڑھے گی اور یہ سب چل کر آپ کے پاس واپس آئیں گے لیکن تب ان کو لات مار دینا ۔الیکٹرونک پاسپورٹ سہولت کے اجرا کی تقریب سے خطاب کرتے ہوئے وزیر داخلہ نے کہا کہ مجھے مشاورت میں نہیں رکھا لیکن پیسوں کے 2،4 ٹرک وزیراعظم اگر مجھے بھی دے دیتے تو بات یہاں تک نہ پہنچتی۔ کیڑے مکوڑے پیسے لے کر اپنے ضمیر کو بیچتے ہیں، انہوں نے صدام حسین اور اسامہ بن لادن کا مال کھایا، مال اپوزیشن کی کمزوری ہے لیکن ضمیر فروش ناکام ہوں گے، ضمیر فروشوں کی سوچ جو مرضی ہو لیکن عوام کی سوچ اور ووٹ عمران خان کے ساتھ ہے، عمران خان کے ساتھ میں چٹان کی طرح کھڑا ہوں۔وفاقی وزیر داخلہ نے کہا کہ یہ گیٹ نمبر 4 جی ایچ کیو کی پیداوار ہیں اور حمیدگل ان کے سیاسی مشیر ہوتے تھے، سب جانتے ہیں کہ میثاق جمہوریت کس نے کرایا تھا۔شیخ رشید نے انکشاف کیا کہ انہوں نے سعودی فرمانروا شاہ عبداللہ کے ذریعے فوج پر دبائو ڈالا اور فوج کو مجبور کیا لیکن وہ ایسا نہیں چاہتی تھی کہ یہ سعودی عرب جائیں۔ اسی طرح کا ڈراما اٹک میں ہوا اور یہ بیمار ہوگئے جس کے بعد آرمی کے میڈیکل بورڈ نے رپورٹ دی کہ ان کی صحت بڑی نازک ہے اور علاج کی غرض سے باہر جانے دینے کا فیصلہ کیا گیا۔
