لاہور(نمائندہ خصوصی)پاکستان ہاکی فیڈریشن کے زیراہتمام یوم قرارد اد پاکستان کے موقع پر نمائشی ہاکی میچ کا انعقاد کیا گیا۔ نیشنل ہاکی اسٹیڈیم لاہور میں کھیلیء جانے والے اس نمائشی ہاکی میچ میں قومی ہاکی تربیتی کیمپ میں شریک کھلاڑیوں نے شرکت کی۔ پی ایچ ایف کی جانب سے اس نمائشی میچ میں کھیلنے والی ٹیموں نے پاکستان گرین اور پاکستان وائٹس کے نام سے حصہ لیا۔ پاکستان گرین کی کوچنگ کے فرائض اجمل خان لودھی انٹرنیشنل نے سرانجام دیے جبکہ پاکستان وائٹس کی کوچنگ کے فرائض عمران بٹ انٹرنیشنل نے سرانجام دیے، نمائشی ہاکی میچ میں پاکستان وائٹس نے پاکستان گرین کو تین کے مقابلہ میں پانچ گول سے شکست دیدی۔ پاکستان وائٹس کی جانب سے شاندار کھیل کا مظاہرہ کرتے ہوئے رومان خان نے چار گول اسکور کئے جبکہ رضوان نے ایک گول اسکور کیا۔ جوابی طور پر پاکستان گرین نے کی جانب سے ارباز نے دو گول اور حنان شاہد نے ایک گول اسکور کیا۔اس نمائشی ہاکی میچ کے مہمان خصوصی سیکرٹری جنرل پی ایچ ایف اولمپین آصف باجوہ تھے۔ انکے ہمراہ ہیڈ کوچ قومی ہاکی ٹیم سیگفرائیڈ ایکمین، گول کیپنگ کوچ باب ویلڈ ہاف ، مینجر قومی ہاکی تربیتی کیمپ اولمپین خواجہ جنیداور فریکل ٹرینر ڈینیئل بیری بھی موجود تھے۔ معزز مہمانان گرامی کا اس موقع پر کھلاڑیوں سے تعارف کرایا گیا۔
