لاہور(نمائندہ جسارت) مسلم لیگ (ن)کی نائب صدر مریم نواز نے وزیراعظم کے دورہ کراچی پر شاعرانہ انداز میں تنقید کرتے ہوئے کہا ہے کہ ’’غم کرسی تیرا شکریہ ہم کہاں کہاں سے گزر گئے‘‘۔ایک ٹوئٹ میںمریم نواز نے وزیراعظم عمران خان کے دورہ کراچی اور ایم کیو ایم کی قیادت سے ملاقات پر طنز کرتے ہوئے کہا کہ کبھی عرش پر کبھی فرش پر کبھی ان کے در کبھی دربدر غم کرسی تیرا شکریہ ہم کہاں کہاں سے گزر گئے۔مریم نواز نے عمران خان کو مخاطب کرتے ہوئے مزید کہا کہ تھوڑا صبر کر لو بھائی، حوصلہ کرو، عدم اعتماد میں ابھی کچھ دن باقی ہیں، آپ ابھی سے ہتھیار پھینک کر اپوزیشن کی نشست پر آگئے ہو۔
