پیکا آرڈیننس عدالت اور ایوان میں مخالفت کرینگے،شہباز شریف

لاہور (نمائندہ جسارت) پاکستان مسلم لیگ (ن) کے صدر اور قائد حزب اختلاف شہبازشریف نے میڈیا کی جوائنٹ ایکشن کمیٹی کو یقین دلایا ہے کہ پاکستان مسلم لیگ (ن) اقتدار میں آنے کے بعد میڈیا کے خلاف سیاہ، آمرانہ اوراظہار رائے و اطلاعات تک رسائی کی آئینی آزادیوں کے منافی قانون کو منسوخ کردے گی جبکہ پیکا ایکٹ کی ایوان میں بھرپور مخالفت کرے گی۔یہ یقین دہانی انہوں نے پیر کو میڈیا کی جوائنٹ ایکشن کمیٹی کے قائدین سے ملاقات میں کرائی۔ قائد حزب اختلاف سے ملاقات کرنے والا وفد میں پاکستان براڈ کاسٹرز ایسوسی ایشن (پی بی اے)، کونسل آف پاکستان نیوز پیپرز ایڈیٹرز (سی پی این ای) اور آل پاکستان نیوز پیپرز سوسائیٹی (اے پی این ایس) کے قائدین شامل تھے۔ پاکستان مسلم لیگ (ن) کے صدر نے قاعدہ 145 کے تحت پیکا ترمیمی آرڈیننس کی منسوخی کے لیے پارلیمنٹ میں قرارداد پیش کرنے کا فیصلہ کیا ہے۔ اس ضابطے کے مطابق کسی آرڈیننس کو منسوخ کرنے کے لیے پارلیمنٹ کے مشترکہ اجلاس میں قرارداد پیش کی جاتی ہے جس کی ایوان سے منظوری کے بعد متعلقہ آرڈیننس منسوخ ہو جاتا ہے۔ شہباز شریف نے میڈیا کے خلاف کالا قانون منسوخ کرانے کے لیے پارلیمنٹ کا مشترکہ اجلاس ریکوزیشن کرنے کی درخواست پیش کرنے کا فیصلہ کیا اور پارٹی راہنمائوں کو اس ضمن میں عملی اقدامات کرنے کیلیے ہدایات جاری کر دی ہیں۔ شہباز شریف نے میڈیا جوائنٹ ایکشن کمیٹی کے پیکا ترمیمی قانون عدالت میں چیلنج کرنے کے فیصلے کی تائید و حمایت کی۔ انہوں نے کہا کہ پیکا ترمیمی آرڈیننس کو موجودہ حکومت کی آمرانہ، فسطائی اور غیر جمہوری سوچ کا مظہر قرار دیتے ہوئے کہاکہ ہم ان ترامیم کو مسترد کرتے ہیں اور ان تمام کالے قوانین کو ہر قانونی فورم پر چیلنج کریں، ان کا راستہ روکیں گے۔ انہوں نے کہاکہ میڈیا آئینہ ہے جس میں حکمران اپنا چہرہ نہیں دیکھ سکتے تو انہیں اپنے چہرے کے خدوخال کو ٹھیک کرنا چاہییں۔ انہوں نے کہاکہ حکمران اس غلط فہمی میں ہیں کہ شاید وہ جیلوں، سزائوں، قید، جرمانوں اور کالے قوانین سے حق گوئی کو بھی پابند سلاسل کرسکتے ہیں۔ ایسا نہ ماضی میں ہوا نہ ہی اب ہوسکتا ہے۔ شہبازشریف نے میڈیا کی آزادی اظہار اور حق گوئی کے لیے تاریخی جدوجہد کو خراج تحسین پیش کرتے ہوئے کہاکہ تاریخ کے کئی مرحلوں پر میڈیا نے اپنی آزادی کی ناقابل فراموش جنگ لڑی ہے۔ قائد حزب اختلاف نے کہاکہ حکومت بدنیت نہ ہوتی تو یہ مسودہ پارلیمنٹ میں آتا، آرڈیننس کا چور دروازہ نہ استعمال کیاجاتا۔ موجودہ حکومت ہر محاذ پر اپنی بدترین اور تاریخی ناکامیاں چھپانے کے لیے میڈیا کی آنکھ ، زبان اور کان بند کرنا چاہتی ہے۔ ہم یہ نہیں ہونے دیں گے۔ شہبازشریف نے میڈیا کی آزادی اور کالے قوانین کے خلاف میڈیا کی جوائنٹ ایکشن کمیٹی کی جدوجہد کو خراج تحسین پیش کیا اور اس مقصد کے حصو ل کیلیے اپنی جماعت اور بطور قائد حزب اختلاف مکمل حمایت کا یقین دلایا۔