ملتان(صباح نیوز)سینیٹ میں اپوزیشن لیڈر یوسف رضا گیلانی نے کہا ہے کہ میں عوام سے پوچھنا چاہتا ہوں کہ کیا عمران نے مہنگائی کم کی؟ ملتان جلسے سے خطاب کرتے ہوئے انہوں نے کہا کہ عثمان بھٹی کا مشکور ہوں کہ اتنے خوبصورت پروگرام کو ترتیب دیا، میرا یہاں آنے کا مقصد بی بی شہید کا بیٹا بلاول ہے۔یوسف رضا گیلانی نے کہا کہ بلاول کے ساتھ 30ہزار لوگوں کا قافلہ ملتان پہنچے گا، آپ تمام لوگ بلاول کا شاندار استقبال کریں، آپ ثابت کر دیں کہ ملتان بلاول کا ہے،ایسا استقبال کرو کہ پتا چل جائے کہ لوگ بھٹو خاندان سے محبت کرتے ہیں ۔ان کا کہنا تھا کہ عمران خان کنٹینر پر کہتا تھا کہ میں مہنگائی کنٹرول کروں گا، آپ سے پوچھتا ہوں کیا عمران نے مہنگائی کم کی؟ موجودہ حکومت نے جنوبی پنجاب کو صوبہ بنانے کا وعدہ کیا تھا لیکن وعدہ پورا نہیں کیا۔انہوں نے کہا کہ ہم موجودہ حکومت کے خلاف لانگ مارچ کر رہے ہیں، تحریک انصاف نے جو مارچ شروع کیا اس میں کرسیاں خالی تھیں پر جب اب بلاول نے مارچ کا آغاز کیا تو 30ہزار لوگ ان کے ساتھ پہلے ہی سے کھڑے ہیں۔
