کراچی (اسٹاف رپورٹر) میمن برادری نے کرکٹ کے میدان میں بھی اپنی شناخت بنانے کے لیے سرگرمیاں شروع کردیں، کراچی میں آئندہ ماہ ایلیٹا میمن جماعت کی جانب سے ایلیٹا کرکٹ لیگ UCLکا دوسرا سیزان شروع ہورہا ہے جس کی تیاریاں زور و شور سے جاری ہیں۔ اس سلسلے میں UCLکے لیے کھلاڑیوں کی نیلامی کی تقریب مقامی ہوٹل میں منعقد ہوئی جس کے مہمان خصوصی معروف سماجی شخصیت اور میمن خدمت فورم کے سربراہ حاجی مسعود پاریکھ (ستارہ امتیاز) تھے انھوں نے اپنے خطاب میں کہا کہ ایلیٹا کرکٹ لیگ تاریخ رقم کرے گی، کرکٹ کے میدان میں اپنے نوجوانوں کو آگے بڑھانے کے لیے ہم سب کو اپنا کردار ادا کرنا چاہیے ہماری برادری نے ایلیٹا کرکٹ لیگ منعقد کروا کر اسپورٹس کے شعبے میں نوجوانوں کو ایک بڑا پلیٹ فارم مہیا کیا ہے۔ انھوں نے کہا کہ امید ہے کہ UCL کا سیزان ٹو پہلے سے بھی زیادہ کامیابی حاصل کرے گا، اپلیٹا جماعت کے صدر یقوب پوچی نے کہا کہ ہم اپنی جماعت کے نوجوانوں کو ہر میدان میں ہنر مند بنانا چاہتے ہیں۔
